Avropa Məhkəməsi 2005-ci ildə Bərdə şəhər seçki dairəsində yol verilmiş pozuntuların araşdırılması ilə bağlı qərar çıxarıb. Həmin dairədən deputat seçilən Zahid Oruc (Ana Vətən partiyası) ilə deputat ola bilməyən Nemət Əliyevin (AXCP) AzadlıqRadiosunun efirndəki debatının tam mətnini diqqətinizə təqdim edirik. Proqram aparıcısı Xədicə İsmayılovadır. Canlı efirə millət vəkili Pənah Hüseyn də qoşulur, bundan başqa dinləyicilərin yolladığı suallar da efirdə oxunur.
Azadlıq radiosu:
- Qonaqlarımız millət vəkili Zahid Oruc və millət vəkili ola bilməmiş Nemət Əliyev hazırda studiyamızdadırlar. Zahid Oruc Ana vətən partiyasını, Nemət Əliyev Azərbaycan Xalq Cəbhəsi partiyasını təmsil edirlər. Hər ikinizi salamlayıram. Təşəkkür edirik gəldiyiniz üçün. Nemət bəy sizə təbrik düşür yəqin ki, uzun sürən məhkəmə çəkişmənizi başa vurdunuz. Bir şeyi dəqiqləşdirmək lazımdır ki, bu da məhkəmə şikayətinizin məğzi ilə bağlıdır ki, anlaşılmamazlıq olmasın. Avropa Məhkəməsinin verdiyi qərar seçkidə kimin qalib gəldiyi ilə bağlı deyil, seçkinin nəticələri ilə bağlı şikayətlərin araşdırılmaması ilə bağlıdır. Bu məqamı aydınlaşdırandan sonra Nemət bəy ilk öncə sizin təəssüratınızı və bir az da məlumat almaq istəyirəm, neçə il çəkdi bu şikayətin baxılması, çətin idimi, indi nə hiss edirsiniz.
Nemət Əliyev:
- Əvvəla Azadlıq radiosunun bütün dinləyicilərini bu efirdən salamlayıram. Hamınızı xoş gördük, xoş dinləyirik deyirəm. Uzun sürən zamandan sonra nəhayət ki, 2005 –ci ilin 5 noyabr parlament seçkilərində 93 saylı Bərdə şəhər seçki dairəsindən seçicilərin iradəsi nəhayət ki, uzun sürən fasilədən sonra çox yüksək bir tribunadan Avropa insan haqları məhkəməsinin tribunasından öz təsdiqini tapıb. Mən ilk öncə bununla bağlı öz məmnunluğumu ifadə etmək istəyirəm və eyni zamanda bu qərarı qəbul etmiş Avropa İnsan haqları məhkəməsinin bu işlər üzrə araşdırmaçılarına, bu işdə əməyi olanların hamısına təşəkkür etmək istəyirəm. Əvvəla bu qərar nəyi ehtiva edir, hələ ki, bizə çatan məlumat bundan ibarətdir ki seçkilərdən sonra bizim həm dairə seçki komissiyasına həm Azərbaycanda hüquqları və şikayətləri araşdırmalı olan hüquq məhkəmə sisteminə, verdiyimiz şikayət ərizəsinə ölkə daxilində baxılmamışdı, nəzərdən keçirilməmişdi, ona demək olar ki, məhəl qoyulmamışdır bütün bunlardan sonra biz gücümüzü, qüvvəmizi toplayıb, seçki saxtakarlığını özündə ehtiva edən, rayon seçicilərinin iradəsinin ifadə olunmamasını çox ciddi faktlarla rəsmiləşdirərək, sənədləşdirərək Avropa İnsan haqları məhkəməsinə müraciət etdik. Bu 2005 –ci il parlament seçkilərindən dərhal sonra baş verib. Və Avropa məhkəməsi bu gün qərar qəbul edib. Qərarda birmənalı şəkildə göstərilib ki, ədalətli məhkəmə araşdırması baş verməyib, konkret olaraq mənim onlara ünvanladığım şikayət ərizəsi üzrə və konkret ifadə olunub ki, 93 saylı Bərdə şəhər seçki dairəsi üzrə azad və ədalətli seçkilər keçirilməyib. Bu Avropa Məhkəməsinin qərarında birmənalı şəkildə ifadə olunub. Bu o deməkdir ki, nəticələri rəsmi şəkildə elan olunmuş 93 saylı Bərdə şəhər seçki dairəsindən seçki nəticələri həmin dairədən seçicilərin iradəsinin ifadəsi kimi sayıla bilməz və qəbul edilə bilməz. Hələ ki bu qədər.
Azadlıq radiosu:
- Burada söhbət ondan gedir ki, həqiqətən də Nemət Əliyevin konvensiyanın bir saylı protokolunun 3- cü maddəsi azad seçki hüququnun pozulması ilə bağlı da qərar ehtiva edir ki, seçki hüququ pozulub. Siz nə düşünürsünüz Zahid bəy məhkəmənin qərarı barədə və məhkəmənin qərarı sizə hansı növbəti addımları diktə edir ya siz hansı növbəti addımlar atmaq istərsiniz bundan sonra?
Zahid Oruc:
- Xədicə xanım, birinci növbədə bildirim ki bu məsələ ilə bağlı geniş efir təşkil etməklə buna aydınlıq gətirmiş olursunuz. Bu fərdi hadisəni ictimailəşdirmək bunun üzərində müxalifətin gələcək mübarizəsini təşkil etmək üçün xeyli cəhdlər var və özləri guya hüquqi məsələni müəyyən qanun çərçivəsində saxlamaq istəyənlər özləri növbəti təhrif, növbəti saxtakarlıq etməkdədirlər. Yəqin ki bunlara bir az sonra toxunacam. Qısa olaraq obrazlı ifadə ilə deyim ki, mənim taleyimə müxalifəti məğlub etmək yazılıb. Mən açıq desəm ki, xüsusi olaraq təkcə bir dairənin planında götürmürəm, bilirsiniz ki, mən müxalifətin özünü rəhbər sayan şəxsləri ilə də aktiv mübahisə şəraitindəyəm, onlarla müxtəlif debatlarda, diskussiyalarda oluruq. Məfkurə sistemimiz xeyli ayrıdır, bunun nəticəsi olaraq da müxtəlif formalarda siyasi toqquşmalarda oluruq. Dünən ATƏT – in Bakı bürosunun təşkil etdiyi debatlarda açıq şəkildə dedim ki, onların siyasi mülahizələrinin və gələcək seçki taktikalarının yanlış qurulduğunu sübut etmək üçün hörmətli Əli Kərimlini də normal debata dəvət edirəm. Çox ümidvaram ki, siz təkcə bir fərdi rayonun, dairənin planında yox, gələcək siyasi mübahisə üçün bu debatları da təşkil edəcəksiniz. İkinci başlıca məsələ, mənim dediyim təhrif və saxtakarlıq nəyin üzərindədir. Avropa Məhkəməsinin həmin qərarında “ ehtimal olunan narahatlıq” ifadəsi yer alır, bu aşkar şəkildə bir tərəfin edilmiş müraciətinin nə olduğu kimi tanınması anlamına gəlmir, seçkilərin nəticələrini təftiş etmir, qalib və ya məğlub müəyyən etmir, yalnız seçki hüququna aidiyyatı olan məsələni məhkəmə müraciəti onun bütün lazımlı faktlarla araşdıran və s. – nə özündə ehtiva edən müddəadır. Siz diqqət etsəniz orada ifadə var, “ehtimal olunan narahatlıq” və şikayətin araşdırılması zamanı yalnız rəsmi nəticələrə istinad olunması müddəası ifadəsini tapıb. Bu o deməkdir ki, hər hansı bir dairə komissiyası bundan sonrakı mərhələdə Mərkəzi Seçki Komissiyası və yaxud da məhkəmə qurumları hər hansı bir şikayətin prosedur üzrə araşdırılmasının təminatı zamanı vətəndaş hüquqları, onun müraciətində olan tələbləri tam təfsilatı ilə araşdırmaq deyil, yalnız rəsmi nəticələrə istinad etmişdir. Bu heç bir halda mənim Bərdə camaatının səsinə söykənən halal qələbəmi şübhə altına almır, Bərdə camaatının iradəsinin üzərinə sual işarəsi qoymur.
Azadlıq radiosu:
- Amma məhkəmə qərarına qədər istənilən narahatlıq və şikayət ehtimal olunan narahatlıq əsasında qurulur. Məhkəmə qərarından sonra bu ehtimalın həqiqət olduğu təsbit edilir. Məhkəmə qərarında yazılıb ki, Avropa Məhkəməsi bir saylı protokolunun üçüncü maddəsi üzrə bir azad seçki hüququnun pozulduğu qənaətindədir.
Zahid Oruc:
- Məsələ ondadır ki, hər hansı bir formada məhkəmədə hansısa prosesləri, hansısa məsələni bir məntəqədə pozuntunu aydınlaşdırmağın özü də seçki hüququnun tərkib hissəsidir. Seçki hüququna daxil olan müddəa yalnız konkret olaraq bir dairədə aparılmış mübarizənin nəticəsində, səs saymada, bunun haqqının nə cür olub olmamasını özündə ehtiva etmir. Bir daha məsələyə diqqətlə yanaşın, burada ehtimal konkret olaraq onun üzərinə qoyulub ki, irəliyə sürülən müddəalar yalnız siyasi mülahizədir, yalnız bəyanatlardır və konkret olaraq
Azadlıq radiosu:
- Bu sizin mülahizənizdir?
Zahid Oruc:
- Yox, iddiaçının, kiminsə, söhbət indiki danışdığımız hal üçün yox, ora göndərilən müraciətlərin çoxunda belədir. Bir az konkretləşdirək, seçki mübarizəsi konkret iki ayın, bir aylıq təbliğat dövrünün hadisəsi deyil, o dönəm üçün böyük bir mübarizə yolunu keçmək, insanlarla etimad və etibar mühitini əldə etmək, onların ictimai qayğılarını daşımaq, parlament üzvü kimi bu vəzifələri yerinə yetirmək və s kimi parametrləri özündə daşıyır. Bu cəhətdən mən hər zaman Bərdə camaatının etibarını üzərimdə hiss etmişəm. Rəqiblərimizdən fərqli olaraq mən keçirdiyim 45 görüşün fonunda onlar yalnız son gülər seçkiyə qatılaraq
Azadlıq radiosu:
- Zahid müəllim, söhbət sizin necə deputat olmanızdan getmir, söhbət sizin deputat olub olmamanızdan gedir.
Zahid Oruc:
- İcazə verin, bunu özündə ehtiva edən sonuncu fikri bildirim. Yəni bu mübarizə sonucunda həmin aparılan o fəaliyyət, seçki təbliğatı işi, ondan əvvəlki qurulmuş qurulmuş işlər, insanlarla dediyimiz ünsiyyət mühiti, onların məntəqələrdə məhz mənə mövqelərini ifadə etmələrinə səbəb olub. Narıncı rəng özündə narazılıqları daşıdığından bizə özünü rəqib sayan insanların da konkret səsi olub və onlar da tanınıb. Heç bir məntəqədə, bütövlükdə dairədə və ya digər instansiyalarda seçki pozuntusunu özündə ehtiva edən bir dənə də fakt qoyulmayıb nə dairəyə nə də Mərkəzi Seçki Komissiyasına. Bunu sizə məsuliyyətlə deyirəm. Mən bir az xarakter etibarilə insanların daim içində olduğumdan, ictimai dairələrin, xüsusilə də zəhmətkeş kütlələrin içində olduğumdan, onlarla apardığımız mübarizənin sonucunda bərabər qələbəni yaşadığımızdan tam əminliklə deyirəm ki, o qələbə mənim öz daxilimdə diskomfort yaradardı. Sonradan heç nəyə əsaslanmadan yə halal sahibi olmasaydım mənim özümün birinci daxilimdə diskomfort yaranardı. Ona görə deyirəm ki, o nəticələr Bərdə camaatının iradəsini ifadə edir. Amma sonradan heç nəyə əsaslanmadan, orada məntəqədə belə deyilir, kimlərəsə nəsə tapşırılmışdı özündə sənədləşdirib bir bəyanat halına salan, bunun nəticəsində də haralarasa müraciət edən, bunu məhkəmə materialı kimi, ciddi hüquqi dəlil kimi qəbul edə bilərdimi? Budur məsələnin mahiyyəti.
Azadlıq radiosu:
- Nemət bəy
Nemət Əliyev:
- Çox sağ olun, əvvəla mən Zahid Orucun axırıncı fikrindən başlamaq istəyirəm ki, bu çox məsuliyyətli adam imiş, özündə məsuliyyət hiss edirmiş mən açığı ilk dəfədir bu adamı görürəm və məndə o qənaət yarandı ki onun qədər məsuliyyətsiz adam yoxdur. Bu adam hesab edir ki, bizim bütün məntəqələrdə, Dairə seçki komissiyasında, Məşvərətçi səs hüquqlu komissiya üzvlərimiz olub, həlledici səs hüquqlu komissiya üzvlərimiz olub, yüzlərlə müşahidəçilərimiz olub, bundan əlavə 2005 –ci ilin noyabr seçkilərini müşahidə etmiş çoxsaylı beynəlxalq müşahidəçilər olub. Deməli bunların zamanında qaldırdığı məsələlər, ortalığa çıxardığı seçki saxtakarlığı ilə bağlı məsələlər hamısı yanlış imiş, Zahid Orucun bir dənə o fikri həqiqət ifadə edirmiş ki, o xüsusi şəxsi mülahizələrindən irəli gələn fikri doğru imiş ki, orada heç bir qayda pozuntusu olmayıb. Mən açığı bu məsələlərin üzərində çox qalmaq istəmirəm. Bir dənə onu demək istəyirəm ki, yox idi ki, fərz edək ki siz dediyiniz doğru idi həmin dairədən heç bir seçki saxtakarlığı olmamışdı, o zaman həmin seçkinin keçirilməsində məsuliyyətli olan dairə komissiyası, Mərkəzi Seçki Komissiyası , seçki saxtakarlığı, cinayət saxtakarlıqlarının araşdırılması üzrə məsuliyyət daşıyan, haqqı ədaləti ortaya çıxarmalı olan məhkəmə sistemləri zəhmət çəkib, mənim onlara təqdim etdiyim sübutları, faktları araşdıraydı bir araşdırma aparandan sonra ifadə edib deyəydi, o qənaətə gələydi ki, həmin dairədə heç bir seçki saxtakarlıqları olmayıb. Amma onların hamısı bu məsuliyyətdən qaçıblar. Onlar ümumiyyətlə o faktlara yaxın düşmək istəməyiblər. Çünki fakt çox kəsərlidir, qorxublar. Əlahəzrət faktın gözünün içinə baxmaqdan qorxublar. Birinci məsələ bu. Araşdıraydınız, mənim doğru olmadığımı Azərbaycan məhkəmələri ifadə edib deyəydi. Amma faktları araşdırıb deyəydi. Onun borcudur bu, çünki mən Azərbaycan vətəndaşıyam. Bu bir, ikincisi mən özümü qoydum bir qırağa. Həmin dövrdə seçkilərin sonunda bilirsiniz ki, Azərbaycanda seçkiləri çoxlu beynəlxalq müşahidəçilər gəlib müşahidə etmişdilər, beynəlxalq müşahidəçilər seçkilər qurtarandan sonra yekdillikdə qərar qəbul etdilər ki, Azərbaycanda noyabr seçkilərində 43 faiz saxtakarlaşdırma olub. Bu bir, ikinci ən ciddi faktdır. Üçüncü ən ciddi fakt isə, bu gün Avropa insan haqları məhkəməsi Azərbaycan hökuməti həmin konvensiyadan irəli gələn öhdəlikləri yerinə yetirmək barədə müqaviləyə qol çəkib, imza atıb, üzərinə öhdəlik götürüb ki, onların araşdırmasına heç bir şübhə olmasın, heç bir şübhə yeri qalmasın. Bu gün də Avropa insan haqları məhkəməsi mənim onlara təqdim etdiyim sübutları sizin yox, sizin təmsil etdiyiniz hökumətin onlara verdiyi cavabları araşdırandan sonra o qənaətə gəlib ki, 93 saylı Bərdə şəhər seçki dairəsində azad seçki olmayıb. Yəni seçkinin nəticələri saxtalaşdırılıb. Saxtalaşdırılırsa, deməli oradan mandat almış şəxs həmin Bərdə rayon seçicilərinin iradəsinin ifadəsi kimi ortalığa çıxa bilməz. Bu gün siz hamıya şübhə edirsiniz. Biz insanıq hamımız. Əvvəla müxalifətin təmsilçisi kimi yox adi insan kimi yanaşmalıyıq bir – birimizə. Mənə etibar etmirsiniz. Mənim təmsilçim olan çoxsaylı yerli müşahidəçilərin fikirlərinə inanmırsınız. Azərbaycan məhkəmələrinə müraciət etdik ki, heç olmasa siz araşdırın, siz deyin, onlar da bu işi etmədilər. Beynəlxalq müşahidəçilərə inanmırsınız, Avropa insan haqları məhkəməsi bütün dünyada bu məlumat yayılıb artıq, onlar bir qərar çıxarırlar, onlara da inanmırsınız. İndi biz sizlə hansı dildə danışmalıyıq, nəyi izah etməliyik sizə? Mən sizə konkret olaraq bir – iki fakt deyəcəm. Misal üçün, bir seçki dairəsindən
Zahid Oruc:
- Bərdə məntəqəsindən
Nemət Əliyev:
- 93 saylı Bərdə şəhər seçki dairəsindən danışıram. Məntəqələrin birindən 760 dənə bülleten oğurlanıb. Bunu müşahidəçilər təsdiq edir. Həlledici səs hüquqlu komissiya üzvləri təsdiq edib. Məşvərətçi səs hüquqlu komissiya üzvləri təsdiq edib. Məntəqə seçki komissiyasının bütün üzvləri təsdiq edib. Komissiyanın sədri təsdiq edib, möhür qoyub. O sənəd bizim əlimizdədir. İndi siz deyirsiniz ki, orada saxtakarlıq faktı olmayıb. Başqa bir məntəqədə 626 bülleten oğurlanıb. Bu da protokollarla təsdiq edilib. Bu kimi faktlar kifayət qədər çoxdur. İndi mən bu sənədlərin hamısını sizə təqdim etməli deyildim ki. Hamımızın inandığımız orqan olub, inanmışıq fikirləşmişik ki, Azərbaycanda seçkilərin keçirilməsinə cavabdeh olan icra orqanı var - Mərkəzi Seçki Komissiyası, o ədalətli seçki keçirər o inanar yəqin ki. Etmişik, onlar da araşdırmayıblar. Ona görə mən tam məsuliyyətimlə deyirəm bizim Avropa İnsan Haqları məhkəməsinə təqdim etdiyimiz sənədlər çox ciddi sənədlər olub. Azərbaycan hökumətinin cürəti çatmayıb ki, orada qaldırılan məsələləri təkzib etsin. Və bu təkzib etmələr mümkün olmadığına görədir ki, Avropa İnsan Haqları məhkəməsi o cür, çox məsuliyyətli qərarın altına imza atıb.
Zahid Oruc:
- Mən sizə deyim ki, müxalifətin məfkurəsində AXCP – də də xüsusilə xeyli zədələnmələr var. Açığını deyim ki, bu özünü adi davranış formalarında da göstərir. Və başqalarından ən minimal hörmət tələb edənlər, özləri kiçicik miqyasda, kiçicik tribunada ən adi davranışlarına da nəzarət edə bilmirlər. Xədicə xanım şahiddir ki, mən keçmiş dövrdə də bu tribunada olanda heç kəsin şəxsini aşağılayan ən kiçicik sözləri demək istəmir və deməməyə çalışıram. Amma əgər qarşıdakı o hədləri aşırsa, açıq söyləsəm siyasi mübarizədə kifayət qədər güclü insan hesab edirəm nə qədər təvazökarlıqdan uzaq səslənsə də və bayaq söylədim ki, mən onların liderlərini çağırıram mübarizəyə. O insanlara da öz üslublarında cavab verirəm. Mən Nemət Əliyevi o dövrdə də, indiki zamanda da özümə rəqib saymıram. Çünki bütün parametrlər etibarilə mən o insanları, o dairədə udmuşam, halal mübarizə ilə udmuşam. Mən indi sizə sübut edəcəm ki, pafosla deyilən sözlərin alt qatında nə gizlənir. Əvvəla sizə deyim ki, məsuliyyət məsələsini müəyyənləşdirmək üçün sizin barometriniz yoxdur. Sizi aşağılamaq istəmirəm. Sizə deyim ki, məsuliyyət sarıdan özünüzün probleminiz var, bu sarıdan cəmi bir dəfə çıxdığınız efirdə və beş – altı kənddə keçirdiyiniz, on – on iki adamla görüşlərdə o üslubu göstərmisiniz. Qaldı məsələnin ikinci tərəfinə bilirsiniz Xədicə xanım parlament üzvü olmanın öhdəlikləri də var, gərək onu yerinə yetirəsən. Onda insan daxilən özünü hansısa mübarizəyə hazır hesab edir. Əks halda yaradılmış xüsusi bir üst müstəvidə fəaliyyət apararaq, özünü bütövlükdə insancanlı, cəmiyyətcanlı, millətcanlı göstərmək də mümkün deyil. Mən xarakter etibarilə söylədim ki, bu insanların içindən çıxmışam. Və Bərdə camaatı çox etibarlı insanlardır. Son dərəcə insaflı insanlardır. Həddən artıq humanistdirlər. O illər ərzində Bərdə camaatı ilə böyük mübarizədə, böyük yolda fədakarcasına birlikdə işləmişik. Sadəcə iki ay, bir ay haradansa peyda olub, o rayonda doğulmuş olsalar belə mənim qabağıma mübarizlər kimi, fədakarlar kimi, narıncı inqilabın baniləri kimi çıxan adamları mən sadəcə udmalı idim. Yalnız ona görə ki onlarla mübarizə aparmırdım. Burada siz dəvət etdiniz, açığını deyim, yalnız bunun üçün gəldim. Məni hələ də təəccübləndirir ki, bunların ən minimal səviyyədə hüquqşünasları belə bunlara məsləhət vermir ki, bu məhkəməyə müraciət olunmuş həmin araşdırmanın, faktın bə yaxud mülahizənin ya bəyanatın məhkəmə araşdırılmasına prosedur üzrə tam yerinə yetməməsinə verilən reaksiyadır. Bu Bərdədə camaatın rəyini ifadə edən son hədd deyil. Bu Avropa məhkəməsi tərəfindən qalibi, məğlubu elan edən forma deyil. Bu məsələnin ən prinsipial tərəfi. İkinci tərəfdən sizə bir fakt deyim, həm də gələcək mübarizə üçün, açığını deyirəm, qarşıdakı veriləcək qərarları da toparlayıb beynəlxalq qüvvələri Azərbaycan hakimiyyəti üzərində dəyənəyə çevirmək istəyən, ATƏT – in Bakı ofisini şikayət edirik ki, Kreml ol, bizim üzərimizdə mövqelərini de ki, bizim istəklərimiz bir az keçərli olsun, forması üçündür. Sadə müstəviyə gətirsək bundan ibarətdir. Və bu müddət ərzində hətta orada doğulanların öz kəndinə beş ildə bir dəfə getdiyi fonunda mən Zahid Oruc olaraq burada özünü mənə rəqib sayan Nemət Əliyevin kəndində yeddi dəfə olmuşam. Və o insanların böyük bir hissəsini adbaad tanıyıram. Böyük bir hissəsinin ağırlıqlarını çiynimdə daşımışam. Mən Bərdənin 16 kəndinin mavi yanacaqla təmin edilməsində rol oynamışam, Bərdənin 20 – yə qədər artezian quyularının qurulmasında rol oynamışam, bir neçə məktəbinin təmir olunmasında rol oynamışam, bir Bərdəli bura gələndə onu boş buraxmamışam. Ora gedəndə ayaqlarına gedib görüşmüşəm. Mən zatən sadə, sıravi insanın övladıyam. Həmişə də xarakter etibarilə, mahiyyət etibarilə, ruh etibarilə o insanların mənafelərini qorumağa çalışmışam. Bərdə camaatı həmişə bunu yüksək qiymətləndirib. Sabah mənim qarşıma çıxacaq mübarizlər üçün, mücahidlər üçün, nə bilim kimlər üçün birinci növbədə camaat öz əzmini qoyacaq ortalığa.
Azadlıq radiosu:
- Məntəqələrlə bağlı məsələ
Zahid Oruc:
- Qaldı ki, hər hansı bir formada, seçkilərdən sonrakı dönəmdə prinsipial mövqeyim bundan ibarət olub ki istənilən bir məntəqədə son fakt nədirsə o tanınmalıdır, ifadəsini tapmalıdır və necə deyərlər onunla bağlı tədbirlər görülməlidir. Şəxsən mən Zahir Oruc olaraq heç bir pripiskaya, heç bir saxtalaşdırmaya, heç bir qolunun yarısını qutuya salmağa ehtiyacı olmayan insanam. Və mən halal qələbədən danışırsamsa, minlərlə insanın o dövr üçün o mübarizədə iştirakını və mənə təbriklərini göstərə bilərdim. O insanların imzalı təbriklərini göstərə bilərdim. Və bunlar qətiyyən təşkil olunmuş xalq məktubları deyildi. Əgər MSK – da və yaxud məhkəmə qurumunda hər hansı bir o dövrdə iştirak edən namizədlərin mövqelərinə baxılmayıbsa və o geniş şəkildə araşdırılmayıbsa bunun nəticəsində Avropa Məhkəməsinə müraciət edib məhz o prosedur və məhkəmənin Avropa standartına baxılmaması hadisəsinə görə verilmiş bir qiyməti qələbə kimi fəaliyyət aparmanın bir adı yoxdur.
Azadlıq radiosu:
- Konkret olaraq söhbət gedir ki, bir məntəqədən bülletenlər oğurlanıb. Bu barədə protokollar var. İki məntəqə barədə konkret danışıldı və bu şikayətlərə baxılmayıb.
Zahid Oruc:
- Bunların hamısı seçki dövründən sonrakı dövrdə bu addımı ataraq dairəyə təqdim etmək istəyiblər. Faktlar olmadığından ki, bunu necə yerinə yetirsinlər, eyni zamanda sizə açıq deyim, seçki dövründə bunlara komanda verilmişdi ki, bir az səfirliklər bir az da narıncı inqilabın eyforiyası 35 -40 yer bizə veriləcək, narahat olmayın, hətta mübarizə aparmasaq belə bizim üçün problem olmayacaq. Bunun üçündür Bakıda bəslənmişdilər. Mən bayaq deyildi ki, ATƏT 43 faiz nəticələrə özünün iradını ifadə edib. Pənah Hüseyn müxalifətin o dövr “ Azadlıq blokunun” seçki qərargahının rəhbəri idi və bütün konfidensial nəticələr onda var. O da bilir, İsa Qəmbər də bilir, Əli Kərimlisi də bilir ki, Zahid Oruc orada halal qələbə qazanıb. Onların dediyi ilə 50 dairədə seçkilərdə onların mövqeləri basılıb, uduzublar. Haradasa bülletenim oğurlanmasını iddia edirlər, axı buna nə ehtiyac var idi, əgər mənə pambıq pripiskası lazımdırsa, əgər mənə bütün məntəqələrdə qalib gəlmək öhdəliyi qoyulmuşdusa, buna ehtiyacımız yox idi.
Azadlıq radiosu:
- Mən sadəcə mövqeyinizi aydınlaşdırmaq istəyirəm. Qiymət verməyin, faktı aydınlaşdıraq. Siz iddia edirsiniz ki oğurlanmayıb
Zahid Oruc:
- Bu faktın tamamilə mülahizələrə əsaslanan, bir neçə məntəqədə dayanmışıq, qüvvə də yoxdur bütün məntəqələri əhatə etməyə. Onlar hansı resursla da mübarizə aparıblar bizə bəllidir. Onlar kimlə, harada, necə görüşüblər aydındır. Hansı platformada dayanıb danışıblar o da zatən aydındır. Mən özünün kəndində, o kənddə ki, özü doğulub öz haqqı ilə aldığı səslər tanınıb və öz ifadəsini tapıb. O yerdə ki bir başqa insan da olub və siyasi mənsubiyyətinə görə müxalifət deyil, onun da nəticələri tanınıb. Bilirsiniz necədir hansı səs göstərilibsə o da protokollarda ifadəsini tapıb. Hətta bir məntəqədə mənim nəticələrim bir başqasının adına yazılıb.
Azadlıq radiosu:
- Zahid bəy, üzr istəyirəm. Protokollar, o səslər oğurlanıb, oğurlanmayıb?
Zahid Oruc:
- Bunu özündə ifadə edən heç bir fakt dairəyə təqdim edilməyib. Bunu tam məsuliyyətlə deyirəm.
Azadlıq radiosu:
- Amma Avropa məhkəməsinin qərarından görürük ki, dairəyə təqdim olunub amma dairə baxmayıb.
Zahid Oruc:
- Qətiyyən. Dairəyə təqdim olunan siyasi mülahizələri özündə ifadə edən beş – on nəfər tərəfdarın seçkidə inzibati resurslar Zahid Oruca işləmişdir kimi müddəaları özündə daşıyan mövqedən başqa heç nə deyil. Bir daha təkrar edirəm, o dövr üçün, o aparılan mübarizənin minlərlə şahidi var, gedin Bərdəyə jurnalist araşdırması aparın, siz görəcəksiniz ki, iyirmiyə qədər namizədin biri xatırlanmır, biri tanınmır. Deyəcəklər, Zahid Oruc xalq adamıdır, bizim adamımızdır, o efir işində də, parlament işində də, qanunvericilik prosesində də, seçicinin ayağına gəlməkdə də fəal olub. Vicdanla, ləyaqətlə mübarizə aparıb.
Azadlıq radiosu:
- Yəni artıq deputat olandan sonra bəlkə Nemət Əliyev də belə olacaqdı?
Zahid Oruc:
- Xeyr, ona qədər də mən belə olmuşdum. Zatən mən ondan əvvəlki dönəmdə də parlament üzvü idim bunu unutmayın.
Azadlıq radiosu:
- Üzr istəyirəm, əvvəl dinləyicilərin ismarıclarını oxuyum. Vəfa yazır, Zahid bəy, xahiş edirəm 2005 –ci ildən seçicilərinizin hansı problemini parlamentin müzakirəsinə çıxarmısınız? Mən sizin ancaq müxalifətə qara yaxmanızı eşitmişəm.
Yəqin ki, bu bayaq sadaladığınız
Zahid Oruc:
Yəni istəmirsiniz cavab verəm?
Azadlıq radiosu:
- Hamısını oxuyum sonra.
“ Zahid Oruc hansı üzlə sizin verilişə qoşulur bəlkə özünün saxta deputatlığına saxta don geydirməyə cəhd edir, bu işdə necə piyada olduğunu təsdiq edir. Xəbərsiz imzalı dinləyicidir.
İqbal yazır Hacıqabuldan, “ yoldaş Zahid polis, hakim və s. işdən çıxmamaq üçün seçməyə məcbur olub. Etiraf edin ki, bir dəfə də olsun Bərdə millətinə vəkil olmadınız.
Famil yazır, Xədicə xanım, sizi və qonaqlarınızı salamlayıram. Məncə bu hadisə bir Avropa ölkəsində olsaydı Zahid Orucun yerində olan şəxs özündə cəsarət tapıb deputat mandatından imtina edərdi ”
Zahid Oruc:
- Bəlkə cavab verim icazə versəniz, təxminən eyni qəbildəndirlər. Orada biri anonim yazıb, doğurdan da xəbərsiz olduğunu göstərmiş olub. O cümlədən insanların guya iradəsindən kənar mövqelərini pisləyənlər özləri o iradədən kənar danışırlar. Bunların çoxu ev tapşırıqlarına bənzəyir. Sizə açıq desəm. Bunu ictimai mövqelər saymıram, bu Bərdə camaatının iradəsini özündə ehtiva etməyən, elə bu qrupun çevrəsində olan və onların bura gəlişini və gələcək mübarizəsini təşkil edən daimi özünü göstərən növbətçi mesajlardır. Bu bir, ikinci bu dövr ərzində əgər mən o insanları ki onları təmsil edirəm Qarabağın xüsusi inkişaf proqramı hazırlansın, onunla bağlı dövlət planına hansı müddəalar daxil olub, onun nəticəsində hansı işlər görülüb, onların açılışını necə birgə etmişik, o addımları atan insan kimi daxili məmnunam ki, bütün bu dövrü, bu mandatı, bu fəaliyyəti millətim üçün etmişəm. Amma bu fonda eyni zamanda burada təmsil olunan şəxslərin də lider saydıqları insanlarla fəal kontekstdə mübarizədə olmuşamsa və heç vaxt onlardan qorxmamışamsa və bütün parametrlər üzrə intellektual keyfiyyətlərdə onlarla bu mübarizəyə qadir olduğumu sübuta yetirmişəmsə bundan narahatdırlar ki, hakimiyyət cinahında belə insan var, buna görə də sağdan soldan çirkli suları üzərimizə axıtmaqları ilə deyil. Gedin Bərdə camaatından soruşun deyəcəklər yüzlərlə problemin həllində Zahid Oruc rol oynayıb. Bu müddət ərzində bəlkə 80 -100 görüşlər keçirmişik. Bir daha təkrar edirəm, elə kəndlər var ki, yeddi, səkkiz dəfə olmuşam.
Azadlıq radiosu:
- Zahid bəy, mən davam edim ismarıcları oxuyum. Çünki suallar sizə ünvanlanıb
Zahid Oruc:
- Məncə artıq tərəf müqabilim də danışsın sonra
Azadlıq radiosu:
- “ Sizin gücünüz sizin YAP – ın maşası olmanızdır. Bərdəlilər sizi yaxşı tanıyır. Camaatın torpaqlarını da almısınız, siz təyin olunmusunuz” yazır dinləyicilərdən biri.
İqbal yazır, bu hakimiyyətə vəkillik edib haqq alanlar çoxdur, imkanınız varsa millətə vəkillik edin, əgər millət sizi seçibsə.
Zahid Oruc bu nağılları kimə danışır? Başqa bir dinləyici yazır.
Vüsal yazır, Xədicə xanım, Zahid Orucun yadına salın ki, rayondakı kəndləri mavi qazla təmin etmək, artezian quyusu qurdurmaq parlamentarın işi deyil, bələdiyyə üzvünün işidir. Belə quyu və qaz həvəskarıdırsa niyə deputatdır bələdiyyə üzvü deyil? Namizədliyini verəydi bələdiyyə üzvlüyünə, növbəti bələdiyyə seçkilərinə qədər də bu dediyi işlə məşğul olaydı. Deputat qanuvericiliklə məşğul olur, elə deyilmi.
Soltan yazır, Allahın salamı olsun. Hal – hazırda Bərdədə işləyirəm, nəzərinizə çatdırım ki, Bərdənin kəndlərindəki vəziyyət elə də ürəkaçan deyil. Hətta burada bir kənd var, Xanərəb onun girəcəyində güllələnmiş bayraq var idi. O bir neçə ay öncəyə qədər yolun qırağında məni kövrəldirdi. Bir azdan onun şəklini sizə göndərəcəyəm.
Zahid Oruc:
Cavab verim?
Azadlıq radiosu:
Hələ bir az da var.
Zahid Oruc:
Maşallah nə qədər çox var.
Azadlıq radiosu:
- “ Zahid Oruc nala mıxa döyməyin, Avropa insan haqları məhkəməsinin qərarı seçildiyiniz dairədəki seçkini ən azından şübhə altına alıb. Məhkəmənin şübhəsi heç sizi utandırmırmı görən?”
“ Bərdə kəndinə qaz çəkməklə fəxr edirsiniz sanki hökumətin borclu olduğu bir işin yerinə yetirilməsinə minnət qoyulur.”
Xalid İbrahimli yazır, Zahid Oruc uşaqlarınızın gələcəyini düşünün, mənim belə atam olsaydı ondan imtina edərdim.
Zahid Oruc:
Təşəkkür, yaxşı ki sizin atanız deyiləm.
Azadlıq radiosu:
- “ Salam, Zahid Oruc siz ki bu qədər savadlı, siyasətçisiniz, qanunsevərsiniz niyə Avropa Məhkəməsinə lazım olan sənədləri təqdim etməmisiniz?” Hörmətlə Fuad
Zahid Oruc:
- Əvvəlcə, birinci oxuduğunuz mesaj, mənim torpaq almağım ya oradakı fəaliyyətimi özündə ehtiva edirdi. Xədicə xanım, bu efir bitəcək, Azərbaycan var mövcuddur, onun gələcək inkişafı da qabaqdadır, Allah hər birimizə can sağlığı versin, biz də yaşayacağıq. Sizə məsuliyyətlə deyirəm ki, bir başqalarının kimin hansı cinayətdə, hansı mövqedə məsuliyyətli olmasından və məsuliyyətsiz olmasından asılı olmayaraq bu dövr ərzində bir Bərdəlinin bir dollarına, yarım dollarına bulaşmadım, bu dövr ərzində yarım kv metr özüm üçün orada güzaran qurub, ya doğmalarım üçün köçkün adına bir məkan qurub fəaliyyət aparmadım. Bu on il ərzində çoxları o mandatı mədə maraqlarına xidmət etdirərdi. Bu on il ərzində orada müxtəlif qurumların rəhbərləri ilə iş birliyində hansısa addımlar atardı. Mən bu mandatı ən sıravi insanın mənafeyinə xidmət etdirmişəm. Bunu sizə məsuliyyətlə deyirəm və bunu əminliklə, arxayınlıqla deyirəm. Siz görürsünüzmü oxuduğunuz 20 mesajın birinin yarım qram fikri mənə təsir etmir, çünki haqsızdırlar, bəlkə də bir mənbədədirlər, bəlkə də debat üçün müəyyənləşdirilmiş ev tapşırıqlarıdır. Bilirəm ki, bunların hamısı necə deyərlər AXCP – vari rəylərdir. Yoluxdurulmuş, xəstələndirilmiş, təfəkkür zədəsinə malik olan rəylərdir. Bu dövr ərzində qaz və s. çəkilişləri, bələdiyyə işi dövlət qurumlarının işi olsa da parlament üzvündən bəzən insanlar daha çox umurlar. Bu gerçəkliyi siz bilirsiniz. Bəzən hətta ən adi işləri, mənzil kontorunun vəzifəsini də tələb edirlər. Bu yerdə sən o insanların mənafeyini tribunala daşımalı olursan. İnsanlar bilirlər ki, on il ərzinsə Zahid Oruc ən bitərəf jurnalistlərin də mövqeyindən fəal insanlardan biri olub, bu fəallıq sadəcə qanun quruculuğunda sözünə görə, burada danışdığına görə, sizin dəvətlərinizə görə olmayıb. O insanların yanına gedəndə üzüm olmasa mən bu addımları atmazdım. Mənim devizim belə idi. İstər kommunist ol, istər demokrat xalqa xidmətçi ol. Deputat fiziki çəkisini yox, mənəvi, siyasi çəkisini artırmaqla məşğul olmalıdır. Mən bu mövqedə olmuşam. Əməkçinin zəhmət haqqını alın təri qurumamış ver. Mən bu mövqedə olmuşam. Bu devizlərə də, bu sloqanlara da əgər buna prinsiplər demək olarsa bu cür yaşamışam. Ona görə də o cür növbətçi fikirlərlə Zahid Orucu həyat yolundan, dünya görüşündən, əqidəsindən daşındırmaq olmaz. Bəli, mən İlham Əliyevçiyəm. Bəli, özü də fəal insanlardan biriyəm. Bu çoxlarını narahat edir, şəxsi eqoizmlər də var. Cavandır, niyə belədir, və ya müəyyən uğurlar qazanıb. O olmasın, bundanda irəli gələn mövqelər var. Və həm də fəaldır. Böyük meydanda mübarizə aparır, bundan da irəli gələn mövqelər var. Bağışlayın mənə suallar çox oldu, mən reqlamenti gözləyən insanam, amma bu sizdən asılı oldu.
Azadlıq radiosu:
- Bu arada mən prodüserimizdən xahiş etmişdim ki, MSK –nın işçisi Azər Sarıyevi də verilişə bağlasın. Avropa Məhkəməsinin qərarında onların işinə iradlar öz təsdiqini tapıb. Azər Sarıyev deyib ki, hələ qərar onlara gəlib çıxmadığı üçün şərh verə bilməzlər.
Nemət Əliyev:
- Mən çox təəssüf edirəm Zahid müəllim siz AXCPvari kimi ifadələrdən istifadə edirsiniz. Siz bilməlisiniz ki, AXCP...
Zahid Oruc:
- AXC
Nemət Əliyev:
- AXCP Azərbaycan tarixində öz sözünü demiş, öz möhürünü qoymuş bir təşkilatdır. İkincisi, o fikri yaxşı ifadə etdiniz ki, Bərdə camaatı, Bərdə əhalisi çox qonaqpərvərdir, çox yaxşı insanlardır, düzgün insanlardırlar, əlavə etmək lazımdır ədalətlidirlər, cəsarətlidirlər, sözü üzə deməkdən qorxmurlar, fikri ifadə etməkdən çəkinmirlər, həm də haqqa söykənməyi bacarırlar. Bax biləsiniz ki, onlardan biri mənəm. Bunu ən yüksək tribunalardan deməkdən fəxr hissi keçirirəm. Bütün bunların müqabilində mən sizdən bir sual soruşacam, amma mümkünsə qısa cavab verin. Siz hansı rayonda doğulmusunuz?
Zahid Oruc:
- Mən Gədəbəy rayonunda doğulmuşam.
Nemət Əliyev:
- Bəs etdi, təşəkkür edirəm. İroniyalı şəklində ifadə edirsiniz ki, siz Bərdədə çox olmusunuz, beş ildə öz kəndinə getməyən bir kəs. Bunu elə formada ifadə edirsiniz ki, çox absurd görsənir və səslənir. Necə ola bilər ki, Bərdənin göbəyində doğulub, boya başa çatıb, bütün ömrünü orada yaşamış bir insan Bərdə rayonunda, Bərdə seçicilərinin arasında beş ildə bir dəfə görsənir, siz Gədəbəydə doğulmuş Zahid Oruc az qala gündə görsənirsiniz? Görürsünüz necə gülünc səslənir?! Nə qədər gülünc görsənir?! Ona görə bu cür pafoslu fikirlərlə dinləyicilərin, seçicilərin gözünə kül üfürmək fikrindən uzaq durun, vaz keçin. Bu baş ucalığı gətirmir, bu məsələnin bir tərəfi. Konkret olaraq mən digər məsələlərə keçmək istəmirəm amma demək istəyirəm ki, yenə qarayaxma kompaniyasından əl çəkmirsiniz, dinləyicilər fikirlərini bildirirlər, “ Azadlıq radiosu” Azərbaycanda, azad fikrin ifadəsində, haqqın, ədalətin səsləndirilməsində böyük xidmətləri olan radio stansiyadır, hər kəsin qəlbində özünə yer tapıb, onun çox saylı dinləyiciləri var və dinləyicilər də bu gün dünyada, Azərbaycanda baş verən hadisələrdən xəbərdardırlar, bunn müqabilində öz fikirlərini bildirirlər.
Azadlıq radiosu:
- Nemət bəy, Azadlıq radiosu da, onun dinləyiciləri də özləri öz işlərini həll edərlər, siz öz arqumentinizi deyin.
Nemət Əliyev:
- Mən də onu demək istəyirəm ki, dinləyicilərin hamısına təşəkkür edirəm, elin gözü tərəzidir, gör nə gözəl tutublar nəbzi. Və konkret olaraq başqa bir məsələni demək istəyirəm ki, burada siz çox yayğın getdiniz. Axı siz nə deməlisiniz, siz deməyəcəksiniz ki, mən Nemət Əliyevin mandatını gəzdirmişəm, siz deməyəcəksiniz ki, mən orada saxta seçkilərin nəticəsində mandat əldə etmisiniz. Siz bunu elə bu formada ifadə edəcəksiniz, özünüzə haqsız olduğunuz halda haqq donu, don geyindirməyə çalışacaqsınız. Sizin bütün çıxışlarınız da onun üzərində qurulub. Axı mən sizdən konkret soruşdum, konkret sual qoydum ki, məntəqədə 766 bülleten oğurlanıb. Bunu məntəqə seçki komissiyasının bütün üzvləri təsdiq edib. Protokol əlimizdədir, 626 bülleten başqa məntəqədən oğurlanıb. Siz buna cavab vermirsiniz, siz konkret məsələnin üzərinə getmirsiniz yenə də başlayırsınız qarayaxmalara. Yaxşı, nə edək, fərz edək ki, siz deyəndir, əfəndim, türklər demişkən, türk arkadaşlar demişkən bu məsələlərə aydınlıq gətirilsin deyə biz də müraciət etmişdik Azərbaycanın hüquq məhkəmə sisteminə. Amma mənə belə gəlir ki, Azərbaycanın hüquq məhkəmə sisteminin buna cəsarəti çatmadı həqiqəti ifadə etsinlər çünki onlara yuxarıdan verilən göstərişlər idi, onlar siyasi iradələrini nümayiş etdilər. Amma nə yaxşı ki Avropa İnsan haqları məhkəməsi kimi insan hüquqlarının müdafiəsində duran təşkilatlar, beynəlxalq qurumlar vardır. Kənardan görünən dağa nə bələdçi, mənə elə gəlir ki atalar çox sərrast ifadə edib ki, Avropa Məhkəməsi də artıq Bərdə seçicilərinin bildiyi həqiqəti ən yüksək tribunadan ifadə edib, deyib. Ona görə də mən artıq bir şey demək istəmirəm. Sadəcə onu demək istəyirəm ki, mən eyni zamanda bu qərarı eşidən hər bir şəxs onun fərqindədir ki Azərbaycanda nə baş verib. Və bir daha onun fərqində oldular ki, Azərbaycanda 2005 – ci ilin parlament seçkiləri total saxtakarlıqla keçib. Ən azı mən bunun Bərdə şəhər 93 saylı seçki dairəsi üzrə baş verdiyini sübuta yetirə bilmişəm.
Azadlıq radiosu:
Təşəkkür edirəm, Nemət bəy.
Bəxtiyar Hacıyev yazır, Zahid Oruc deyir ki, bir Bərdəlinin bir dollarına ortaq olmadım. Bərdəlilər də Azərbaycan vətəndaşlarıdır və dövlət büdcəsindən mənimsənilmiş hər bir manatda Bərdəlilərin də haqqı var. Zahid oruc millət vəkili kimi ölkədə korrupsiya ilə bağlı fəaliyyətsizliyinə görə məsuliyyət daşıyırmı?
Fuad Əliyev deyir ki, onun sualına cavab verilməyib, niyə məhkəməni uduzdunuz, yəni Avropa məhkəməsini.
Elçin Muradov yazır ki, bir mərkəzdən idarə olunan şərəfsizdir.
Fuad Əliyev yazır, əzizlərim, mən heç bir partiyanı dəstəkləmirəm. Mən sadəcə Azəri övladıyam. Azad və sərbəst”
“ Mən xəbərsiz imzası ilə yazıram, telefon nömrəm də orada var. Zahid Oruc iqtidarvari yalanlar uydurur.”
“ Salam, Azadlıq, Zahid Oruc Əliyevçidir. Əliyevçiniz niyə YAP –a keçmirsiniz? Gözəl danışıq qabiliyyətiniz var amma yanlış yoldasınız. Milli Cəbhə imzası ilə yazır.
Zahid Oruc:
Xədicə xanım, aydındır. Mən əminəm ki, orada müsbət mesajlar da olsa ötürəcəksiniz. Zatən siz Cəbhə və Cəbhə marağını müdafiə etsəniz məni qətiyyən təəccübləndirməyəcək. İcazə verin, verdiyiniz suallara cavab verim. Efir şərtlərinə görə siz bizi dəvət etmisiniz və biz bu studiyanın qonaqları olaraq mənə yönləndirdiyiniz və ya yönlənmiş sualları cavablandırmalıyam. Sizi inandırım ki, 37 –ci il qaydasında, ona bənzər, ondan artıq 100 suallar da olsa Zahid Orucu daşıdığı platformadan, ideyalardan daşındırası deyil.
Azadlıq radiosu:
- Üzr istəyirəm, Zahid Bəy balaca fasilə verək, siz Pənah Hüseynin bir neçə dəfə adını çəkdiniz burada, biz əlaqə saxladıq. Hər vaxtınız xeyir Pənah bəy.
Pənah Hüseyn:
- Salam.
Azadlıq radiosu:
- Nemət Əliyev Xalq Cəbhəsi Partiyasından 93 saylı Bərdə seçki dairəsinə namizəd olmuş Zahid Oruc həmin dairədə millət vəkilidir, indi studiyadadır, Zahid Bəy sizə istinad edərək dedi ki, Pənah Hüseyn bilir və sizə istinad edərkən Nemət Əliyevin həmin dairədə oğurlanmış bülletenlər barədə protokollar olmasını inkar edirdi, deyirdi ki, Pənah Hüseyn bilir ki, orada nə olub.
Zahid Oruc:
- Xədicə xanım, üzr istəyirəm, Pənah bəy efirdədir, mənim həmkarımdır, mənim sözümü buradan bura təhrif etməyin. Mən söylədim ki, burada deyildi ki, ölkədə seçkilər belə keçirilib, öz üslublarında, mən onu bildirdim ki, apardığımız bütün bu mübarizənin fonunda ki, mən Bərdə camaatının orada bircə səsini gətirib ifadə olunub, nəticə etibarilə mən onların iradəsinə söykənirəm, halal qələbə qazanmışam bunu hətta o dövrdə Azadlıq blokuna daxil olan və ölkədəki seçkilərin bütün vəziyyətinin konfidensiallığını bilən adamlar o cümlədən Pənah Hüseyn də, Əli Kərimli də, İsa Qəmbər də bilir. Sözüm bu cür olub, yəqin sonra lenti fırladıb görəcəksiniz.
Azadlıq radiosu:
- Və bu verilişin tam stenoqramı da olacaq saytda.
Pənah Hüseyn:
- Xədicə xanım, sual verin cavablayım. Zahid bəyi də salamlayıram.
Azadlıq radiosu:
- Zahid bəy indi belə dedi ki, sizi şahid gətirir ki, o halal səslərlə parlamentdə millət vəkilidir
Pənah Hüseyn:
- Zahid bəy təbii ki, öz mövqeyini ifadə etmək bunun üçün dəlillər gətirmək hüququna malikdir. Söhbət Avropa məhkəməsinin dünən saytlarda yerləşdirilən qərarından gedir. Məhkəmə qərarıdır, məhkəmə qərarı da Azərbaycanın qol çəkdiyi müqaviləyə, imzaladığı müqaviləyə əsasən Avropa məhkəməsinin stereotipliyini götürüb. Mən güman etmirəm ki Avropa məhkəməsinin qərarı da qeyri obyektiv olsun, mən bilmirəm Zahid Bəy onunla tanışdır ya yox. Orada altıncı maddə ədalət mühakiməsi ilə bağlı olan məsələlərdir. Hesab edirəm ki, tamamilə doğrudur, baxmayaraq ki dairə komissiyası baxmayıb hətta cavab verməyib. MSK baxmayıb və cavab verməyib, üstəlik bu cür halda da müraciət etdiyi məhkəmələr də həqiqətən ədalətsiz qərarlar çıxardıb. Bunun birbaşa Zahid Orucla əlaqəsi yoxdur. Bu barədə heç bir şübhə ola bilməz. Eyni zamanda isə
Azadlıq radiosu:
- Üzr istəyirəm Pənah bəy, nə şübhə doğura bilməz?
Pənah Hüseyn:
- Yəni məhkəmənin bu qərarı. 6 –cı maddə ilə bağlı olan hissəsi məncə Zahid Oruc tərəfindən də güman etmirəm ki rədd edilsin çünki bütün fakt ortadadır. 3- cü maddə ilə bağlı hissələrdə də yenə yerli məntəqə seçki komissiyaları, dairə seçki komissiyaları hansı əməllərdən çıxıblar və çıxırlar mənə elə gəlir bunu Zahid Oruc da qəbul edə bilər. Hətta bizim iqtidar və ya iqtidaryönlü düşərgədə olan deputatlarla söhbətimiz olur. Onların da bəziləri qəbul edirlər ki, bir çox hallarda qəbul edirlər ki, o dərəcədə öyrəniblər ki, məntəqə seçki komissiyaları, dairə seçki komissiyaları qanun pozuntularına onların bəzən xüsusi əməlləri hətta onların dediklərinə görə deyirəm.
Azadlıq radiosu:
- Mən sizdən birmənalı cavab almaq istəyirəm. Zahid bəy iddia edir ki, seçki qərargahının rəhbəri olduğunuz üçün həmin vaxt sizdə məlumatlar var idi və siz dəqiq deyə bilərsiniz ki, Zahid Oruc orada aldığı səslər həqiqətən də onun millət vəkili olmasına şərait yaradırdı.
Pənah Hüseyn:
- Mən axı nə dairə seçki komissiyasıyam nə məntəqə seçki komissiyasıyam orada müşahidəçi də olmamışam. Mən təbii ki, belə bir iddiada buluna bilmərəm. Mənim öz blokumda olan şəxsin şikayətləri barədə deyə bilərəm ki, bu şikayətlər yüzdəyüz haqlıdır və təsadüfi deyil ki, məhkəmə bunu qəbul edib.
Azadlıq radiosu:
- Vaxtımız çox daralır mən sualları da oxuya bilməyəcəm. Üzr istəyirəm dinləyicilərdən buna görə. Suallar təxminən eyni tipdədir. Nemət bəy üzr istəyirəm sizdən amma son sözü yenə də Zahid bəyə verəcəm.
Nemət Əliyev:
- Mənim deməyə nə sözüm olacaq, Avropa Məhkəməsi mənim sözümü deyib.
Zahid Oruc:
- Avropa məhkəməsi bir daha məhz prosedur məsələsinə öz qiymətini bildirib, bu heç bir halda seçkilərin nəticələrini şübhə altına qoyulacaq bir mövqe deyil bu müxalifətin qarşıdakı seçki dövrü üçün eyforiyası olacaqsa, bu onların növbəti, ardıcıl məğlubiyyətlərini doğuracaqdır, bundan pəjmürdə olaraq və bəzən də xüsusi inqilablardan, o cümlədən bəzən qanlı savaşlardan yön alıb da, hətta zamanında İndoneziyada Suxarto rejimi belə oldu və sairlərdən qaynaqlanıb da mübarizə quranlar, xalqla işləməyənlərin, insanların ayağına getməyənlərin nəticəsi də buna adekvat olacaq. Sizə məsuliyyətlə deyirəm ki, bu dönəmdə , qarşıdakı zamanda da bir parlament üzvü olaraq, bir vətəndaş olaraq bu mübarizəmi davam edəcəm. Sizi tam əmin edirəm ki, özünü mənə rəqib sayanların ya məni özünə rəqib görənlərin hamısını, o dairədə namizəd olan insanları da 2010 – cu ilin seçki mübarizəsində topasını bəlkə də 100 – nü birlikdə məğlub edəcəm. buna şübhəniz olmasın.
Azadlıq radiosu:
- Mən isə dinləyicilərimizə xatırlatmaq istəyirəm ki, qonaqlarımız Azərbaycan Xalq Cəbhəsi partiyasından Bərdə şəhər 93 saylı seçki dairəsində namizəd olmuş Nemət Əliyev və həmin dairədən deputat elan olunmuş - bunu dəqiq deyə bilərəm - Zahid Oruc idi. Avropa İnsan haqları məhkəməsi həmin dairədə Nemət Əliyevin azad seçki hüququnun və şikayət hüququnun pozulduğunu təsbit edib.
