-
Oktyabrın 12-də hakim Yeni Azərbaycan Partiyasının iclası olub.
İclasda hansı məsələlərin müzakirə olunduğu və hər hansı qərar qəbul edilməsi haqda hələlik məlumat ala bilməmişik.
Partiya üzvü, Milli Məclisin Sosial Siyasət Komitəsinin sədri deputat Hadı Rəcəbli AzadlıqRadiosuna deyib ki, iclas YAP-ın 20 illiyi ilə bağlı olub. Ancaq başqa hansı məsələlərin, o cümlədən sabiq deputat Gülər Əhmədova ilə bağlı məsələnin müzakirə edilib-edilməməsindən xəbərsizdir. Çünki iclasa qatıla bilməyib.
Hadı Rəcəbli keçmiş həmkarı ilə bağlı baş verənlərə də münasibət bildirib. O son hadisələrin xoşagəlməz olduğunu və hamının qanını qaraltdığını, dilxor etdiyini deyib.
Komitə sədrinin sözlərinə görə, Gülər Əhmədova hakim partiyadan çıxarılmalıdır: «Mütləq partiyadan çıxarmaq lazımdır. Bu boyda biabırçılıq olub. Bütün Azərbaycan, bütün cəmiyyət bu addımı gözləyir».
Sentyabrın 25-də ABU-nun rektoru Elşad Abdullayev Gülər Əhmədovanın ondan deputat seçilməsi üçün 1 milyon pul alması haqda video görüntülər yayıb. Bundan sonra dələduzluq maddəsi ilə cinayət işi açılıb. Gülər Əhmədova isə deputat mandatından imtina edib.