-
“Rusiya Ukrayna adlı uşağa hamilədir”
Məşhur rus yazıçısı Vladimir Sorokin bunu Almaniyanın “Frankfurter Allgemeine” qəzetindəki məqaləsində yazır.
“Maydanın sarı-mavi spermatozoidi, səs-işıq qumbaralarının partlayışları, Molotov kokteyllərinin alovu və partizan güllələrinin vıyıltısı şəraitində öz kişi borcunu yerinə yetirdi. Həmin qızmar yay ayını televozurun işıq saçan ekranı qarşısında keçirən Rusiya uşağa qaldı. Rusiyanın nəhəng bədəninə yeni həyat rüşeymi düşdü: azad Ukrayna. Zənginlərin hökuməti dəhşətə gəldi, liberallar qibtə etdi – millətçilər nifrət püskürdü”.
“Rüşeym boy ataraq gündən-günə daha çox media məkanını tutmağa başladı. Kiyev inqilabı Rusiyanı ovsunlayıb qorxutdu. Ana oqranizminin daxili həyatının adi axarı qəfil dayandı və adətən belə vəziyyətlərdə olduğu kimi dərin fizioloji prosesə tabe oldu... Rusiyanın öz həyatı ikinci plana keçdi və tamam köhnəldi. Ölkənin gələcəyi ora- Ukraynaya köçmüş oldu... Putin Rusiyasında haqqında daim aşağılayıcı tonda danışılan Ukrayna qəfildən yaman dəbə mindi və müasirləşdi, azman Rusiya isə əksinə tamam köhnəlmiş, geridəqalmış bir əyalətə çevrildi.
“Məlumdur ki, ikicanlı məxluqun canavar iştahı qəfildən çiy ət istəyə bilər. Burda da belə oldu, Rusiya canlı orqanizmdən bir parçanı – Krımı qamarlayıb qopardı. Onu itilənmiş postimperiya caynaqları ilə qopara bilsə də, udmağa gücü çatmadı. Beləcə, qopardığı tikə Rusiyanın boğazında qaldı”.
“Daha sonra Kremldən – ana orqanizminin beynindən siqnal gəldi. Qərar qəti idi: abort etdirməli! Təhlükəli, arzuolunmaz, nifrətəlayiq uşaqdan can qurtarmalı! Abortu “Ukraynada rus yazı” adlandırdılar. Onu separatçılar, sabotajçılar, yaraqlılar, avantüristlər və təxribatçılar gerçəkləşdirməli idi. Ukraynanın cənub-şərqində əməliyyata başlanıldı – özü də düz-əməlli dezinfeksiya-filan etmədən, elə də təzə, təmiz olmayan cərrah alətləri ilə. Anestezioloq işini öz üzərinə televizor götürdü”.
“Ağrıkəsicinin aşırı dozasına baxmayaraq abort, deyəsən, alınmadı. Doğulmamış körpəni ana bətnindən çıxarmaq mümkün olmadı. İndi hər bir rus Ukraynanı öz içində daşımalıdır. O Ukraynanı ki doğrudan da azad və müstəqil olacaq... Ukrayna bizim içimizə girib və biz onu içimizdə gəzdiririk: evsizlər də, oliqarxlar da, kəndlilər də, politoloqlar da, evdar qadınlar da, qumarbazlar da. Putin uzaq Braziliyaya uçanda da Ukraynanı içində aparmışdı. Bu ona futbola baxmağa mane olurdu. Donetsk Xalq Respublikasındakı yaraqlıların komandiri Strelkova isə bu, Rusiya İmperiyasını bərpa etməyə mane olur. “Buk” zenit-raket kompleksinini idarə edənəsə Ukrayna səmasındakı təyyarə maneçilik törədirdi. Buna görə o, təyyarəyə raket atdı. “Boinq-777”nin qəzaya uğraması bir ağrı idi və dəhşətli və qaçılmaz aqibətdən xəbər verirdi”.
“Rusiya Ukrayna adlı uşağa hamilədir. Mütləq doğacaq. Hər şey irəlidədir – getdikcə artan ağrılar, kəsilmiş göbəklər, körpənin ilk çığırtısı. Ona gözəl bir ad da verəcəklər: İmperiya ilə vidalaşma. Uşaqlığı xoşbəxt olacaqmı? Bunu bilən yoxdur. Bir çoxları səmimi şəkildə ona sağlam böyüməyi arzulayacaq”.
Sorokin məqaləni bu sualla bitirir: “Bəs ananın aqibəti necə olacaq? Doğuş çətin və problemli olacaq. Onun orqanizmi buna dözəcəkmi?”