-
Azərbaycan Xalq Partiyasının sədri, deputatlığa namizəd Pənah Hüseyn bu dəqiqələrdə Sabirabad Polis Şöbəsindən çıxıb. Polisə çağırılmağı ilə bağlı AzadlıqRadiosuna danışan namizəd ondan və ailə üzvlərindən şikayət olunduğunu bildirib:
«Polisə şikayətlər təşkil ediblər ki, mən, bəzi qohumlarım və ailə üzvilərim guya nalayiq hərəkətlər etmişik. Bu şikayətləri təşkil edənlərə ayıb olsun ki, bu şər-böhtana mənim qızımı da qatırlar. Mən polisdə dedim ki, indi seçkidə baş verən saxtakarlıqlarla bağlı Mərkəzi Seçki Komissiyasına şikayət hazırlayıram. Qoy bu məsələlər bitsin, 3 gün sonra gəlib nə lazımdırsa, ifadə verərik».
Pənah Hüseyn polisə getməzdən əvvəl isə mətbuata bunları bildirmişdi: «Bunu seçkilərin nəticəsindən şikayət etməməyim üçün təzyiq vasitəsi hesab edirəm. Məsələyə müdaxilə edilməsi üçün respublika rəhbərliyinə müraciət edirəm».
Pənah Hüseyn AZADLIQ-2015 seçki blokundan 63 saylı Sabirabad Birinci Seçki Dairəsindən namizədliyini vermişdi.
O, hələ noyabrın 1-i axşam saatlarında bildirdi ki, seçkinin nəticələri ilə bağlı müşahidəçilərinin məntəqələrdən aldığı protokolların göstəriciləri ilə həm DSK-ların, həm də MSK-nın göstəriciləri uyğun gəlmir. Bu da seçkilərin total saxtakarlıq şəraitində keçirildiyini göstərir.
MSK sədi Məzahir Pənahov isə seçki günü keçirdiyi mətbuat konfransında bildirmişdi ki, Pənah Hüseynin müşahidəçilərindən biri 2 bülleten götürərək qaçıb.