-
“Amnesty İnternational” beynəlxalq hüquq müdafiə təşkilatı Azərbaycanda 22 yaşlı Qiyas İbrahimovun və 21 yaşlı Bayram Məmmədovun həbsini pisləyib.
Təşkilat gənclərin Heydər Əliyevin abidəsi üzərində qraffiti yazdıqdan sonra qanunsuz narkotik dövriyyəsində ittiham olunduğunu qeyd edir.
Bəyanatda vurğulanır ki, gənclərə qarşı ittihamlar uydurma və siyasi motivlidir.
“Amnesty İnternational” polis bölməsində gənclərə bədən xəsarətləri yetirildiyini bildirərək, bunun müstəqil tibbi ekspertizasını həyata keçirməyə və zorakılıq izlərini sənədləşdirməyə çağırır.
Təşkilat həmçinin, hakimiyyəti irəli sürülmüş ittihamların və onlara qarşı pis rəftarın qərəzsiz araşdırılmasını təmin etməyə dəvət edir.
Beynəlxalq “Human Rights Watch” insan haqları təşkilatı də bəyanat verərək gənclərin həbsini pisləmişdi.
Gənc fəallar Bayram Məmmədovla Qiyas İbrahimov mayın 11-də saxlanılıb. NİDA Vətəndaş Hərəkatı onların mayın 10-da Heydər Əliyevin Mərkəzi Bankın qarşısındakı abidəsinin postamentinə yazılan şüarlara görə, saxlanıldığını açıqlamışdı.
Sosial şəbəkələrdə Mərkəzi Bank ilə üzbəüz bağdakı abidənin fotosu yayılmışdı. Abidənin üzərində iki tərəfdən ağ boya ilə Azərbaycan və ingilis dillərində «Qul bayramınız mübarək!», ön tərəfdə isə «F... the system!» sözləri yazılmışdı.
Mayın 12-də Xətai rayon məhkəməsi gənc fəallar haqqında 4 aylıq həbs qətimkan tədbiri seçib.
Daxili İşlər Nazirliyinin məlumatına görə, gənclərin hər birinin üstündən 2 qram, evlərindən isə 1 kiloqramdan artıq heroin çıxıb.
Mayın 10-u keçmiş prezident Heydər Əliyevin 93-cü il dönümü qeyd edilib.
Son illər Azərbaycanda Heydər Əliyevin doğum günü münasibətilə Gül bayramı keçirilərdi. Bu da Azərbaycan cəmiyyətində heç də birmənalı qarşılanmırdı. Hakimiyyətin müxalifləri deyirdilər ki, hər il Gül bayramına milyonlarla vəsait xərcləməkdənsə, bu pullar əhalinin sosial ehtiyaclarının ödənilməsinə sərf edilməlidir. Bu il isə Gül bayramı təxirə salınmışdı.
Bakı şəhər İcra Hakimiyyətindən bildirmişdilər ki, cəbhə bölgəsində Ermənistanın təxribatının qarşısını alarkən həlak olan hərbçilərin ruhuna hörmət əlaməti olaraq mayın 10-da, sadəcə, parklarda gül əkmə aksiyaları keçiriləcək.