Bakı ermənilərin Qarabağdakı evlərinə qayıtmasını istisna etmir. Bunu Rusiyanın “İzvestiya” qəzetinə müsahibəsində Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev deyib. O, ərazi mübadiləsindən söhbət getmədiyini də vurğulayıb.
“Bu cür qayıdış formasına gələcəkdə baxıla bilər”
“Ölkəmiz keçmiş DQMV-nin (keçmiş Dağlıq Qarabağ Muxtar Vilayəti) erməni əhalisinin Azərbaycan ərazisində inteqrasiyasına hazır olduğunu dəfələrlə ən yüksək səviyyədə təsdiqləyib. Ancaq ərazidə yaşamaq hüququ onun zorla qopardılması ilə əvəz olunmamalıdır. Buna görə də sizin sualınıza cavabım – bəli, onlar (ermənilər) Azərbaycanda bizim ölkənin vətəndaşı olaraq, münaqişəyə qədər yaşadıqları kimi yaşaya bilərlər”, – Rzayev deyib.
Buna da bax: İlham Əliyev: ‘Dövlət sərhədində möhkəmlənəcəyik’
Komitə sədri Xankəndində, Xocalı və Ağdərədə yaşayan azərbaycanlıların etnik təmizləmə nəticəsində qovulduqlarını, hazırda həmin ərazilərdə yalnız ermənilərin yaşadıqlarını da qeyd edib. “Ötən il əldə olunmuş üçtərəfli razılaşmada qaçqınların hamısının münaqişəyə qədər yaşadıqları yerlərə qayıtması nəzərdə tutulur. Düşünürəm ki, bu cür qayıdış formasına gələcəkdə, ehtiraslar səngiyəndə baxılacaq”, – o bildirib.
Sizin brauzer HTML5-i dəstəkləmir
Qarabağdan qaçan ermənilər niyə dönmək istəmədiklərini belə izah edirlər
O qeyd edib ki, ermənilər Azərbaycanda münaqişəyə qədər indikindən daha yaxşı yaşayırdılar, “onlar üçün ölkəmizin digər millətləri kimi bərabər şərtlər yaradılacaq”.
Qayıtmaq istəyən ermənilərə təhlükəsizlik təminatının verilməsinə gəlincə, Rzayev qeyd edib ki, Azərbaycanda yaşayanların qarantı dövlət, onun konstitusiyası və qanunlarıdır: “Bütün bunların qarantı isə ölkəmizin prezidenti İlham Əliyevdir”.
Buna da bax: Ermənistana qarşı iddia qaldırmaq istəyən azərbaycanlılar nə etməlidir
Köçkünlərin 70 faizə yaxını qayıtmaq istəyir
Komitə sədri onu da qeyd edib ki, Bakının nəzarətinə qayıtmış ərazilərin minalardan təmizlənməsi 5-10 il çəkə bilər. Hazırda Ağdam, Cəbrayıl və Füzuli rayonları minalardan təmizlənir.
O, 1992-1993-cü illərdə bu ərazilərdən 750 mindən çox insanın didərgin düşdüyünü, hazırda onların 70 faizə yaxınının qayıtmaq istədiyini söyləyib. “Şuşaya isə əhalinin 101 faizi qayıdardı”, – Rzayev gülərək deyib.
Sizin brauzer HTML5-i dəstəkləmir
Tuğ köçkünləri qayıdacaqmı? '30 il Bakıda yaşayandan sonra gərək ora adaptasiya olunaq'
Bu qədər əhalinin işlə necə təmin olunacağına gəlincə, komitə sədri işğaldan azad olunmuş ərazilərdə 1989-1994-cü illərdə mövcud olmuş istehsal sahələrinin bərpa olunacağını, ekologiya və kənd təsərrüfatının önə çəkildiyi ağıllı kənd layihələrinin gerçəkləşdiriləcəyini vurğulayıb.
Mayın 28-də Azərbaycan prezidenti İlham Əliyevin Ağdama səfəri zamanı ona şəhərin baş planı təqdim olunub.
Azərbaycan ötən il 44 günlük müharibə ilə Hadrut, Şuşa daxil olmaqla Qarabağın bir hissəsinə və ətraf 7 rayona nəzarəti geri qaytara bilib. 10 noyabr atəşkəs razılaşmasına uyğun olaraq qoşunların təmas xəttinə Rusiya hərbçiləri yerləşdirilib.