Almaniyanın Kansleri Olaf Şolts Ukraynaya təyyarə əleyhinə yüksək texnologiyalı sistemlər göndərməyə boyun olub. Müxalifət hökuməti Rusiyanın əsassız işğalına qarşı Ukraynaya yetərincə hərbi yardım ayırmamaqda ittiham edir.
İyunun 1-də Berlində deputatlar qarşısında çıxış edən Şolts deyib ki, hökumət Kiyevə IRIS-T raketləri və radar sistemləri göndərmək təklifini təsdiqləyib.
Məqsəd Rusiya Prezidenti Vladimir Putinin Ukraynada başlatdığı müharibəni “udmamasını” təmin etməkdir, Şolts deyib.
“Məqsədimiz budur ki, Ukrayna özünü müdafiə edə, buna nail ola bilsin”, – o, sözlərinə əlavə edib.
***
Britaniya Müdafiə Nazirliyinin iyunun 1-də Twitter-də yerləşdirdiyi məlumatda deyilir ki, Severodonetsk şəhərinin yarısından çoxu Rusiya qüvvələri, o cümlədən çeçen döyüşçülər tərəfindən tutulub.
Donbasdan kənara gəlincə, “Rusiya Ukrayna boyunca infrastruktura uzaqmənzilli raket zərbələri endirməkdədir”, – qurum vurğulayır.
***
Bu arada Ukraynanın şərqində gərgin döyüşlər gedir. Rusiya qüvvələri Severodonetsk şəhərinin böyük hissəsinə nəzarət edirlər.
“Rusiyalılar hücuma keçir, Severodonetskin mərkəzində möhkəmləndir, infrastrukturu və sənaye obyektlərini dağıtmaqda davam edirlər”, – Luqansk vilayəti hərbi administrasiyasının başçısı Sergey Qayday iyunun 1-də Telegram-da yazıb.
Buna da bax: Müharibə potaşı bahalandırıb - Qərb mediasıQaydayın mayın 31-də AzadlıqRadiosunun Ukrayna xidmətinə dediyinə görə, Ukrayna qüvvələrinin mühasirəyə salınacağı sarıdan qorxular əsassızdır.
“Ordu sakitcə öz mövqelərini müdafiə edir”, – deyən Qayday şəhərin 90 faizinin ziyan gördüyünü, zərərin “bərpasının praktik mümkün olmadığını” vurğulayıb.
Qayday Rusiya əsgərlərinin dörd aydır müdafiə olunan Luqansk vilayətini tamamilə tuta bilməyəcəyini sözlərinə əlavə edib.
Buna da bax: Ukrayna iki rusiyalı əsgəri uzunmüddətli həbsə məhkum edir
Ukrayna Prezidenti Volodimir Zelenski isə Ukrayna qüvvələrinin cənubdakı Xerson şəhəri yaxınlığında müəyyən uğur əldə etdiyini, Kiyevdən şərqdə Xarkov vilayətində irəlilədiyini bildirib.
“Rusiya ordusunun avadanlıq və say baxımından əhəmiyyətli üstünlüyünü baxmayaraq müdafiəçilərimiz böyük cəsarət göstərirlər və cəbhədəki vəziyyəti idarə edirlər”, – Zelenski gecə çıxışında bildirib.
***
ABŞ Prezidenti Co Bayden Ukraynaya 80 kilometrədək məsafəni vura biləcək müasir raket sistemləri verməyə razılaşıb.
“Ukraynalıları Ukraynada döyüş zonasında əsas hədəfləri daha dəqiqliklə vurmağa imkan verəcək müasir raket sistemləri və sursatla təmin edəcəyik”, – Bayden mayın 31-də “The New York Times” qəzetində yazıb.
Bayden deyir ki, Rusiyanın Ukraynaya qarşı işğalı diplomatiya ilə bitəcək, amma Birləşmiş Ştatlar Ukraynaya danışıqlar masasında üstünlük əldə etməsi üçün vacib silah və sursatı verəcək.
Birləşmiş Ştatlar HIMARS adlı ksək mobillikli artilleriya raket sistemləri verməyə razılaşıb. Bundan ötrü Ukrayna Rusiya daxilində hədəfləri vurmayacağına “təminat” verib, administrasiyanın yüksək rütbəli rəsmisi belə deyib.
Buna da bax: ABŞ Ukraynaya Rusiya ərazisini vura bilən raketlər verməyəcək700 milyon dollarlıq silah paketi
Rəsminin jurnalistlərə söylədiyinə görə, HIMARS -ın vurma məsafəsi hazırda Ukraynada yerləşdirilmiş haubitsalardan daha uzaqdır. Bu sistemlər iyunun 1-də açıqlanacaq 700 milyon dollarlıq silah paketinə daxildir.
Paketə sursat, antiatəş radarları, hava müşahidə radarları, əlavə Javelin antitank raketləri, eləcə də antizireh silahları daxildir, rəsmi bildirib.
Ancaq paketin əsasını HIMARS sistemləri təşkil edir. Bu silahlar Ukraynanın Donbasda Rusiya artilleriyasına qarşı savaşdığı bir vaxtda göndəriləcək.
Buna da bax: Rusiya Severodonetskin bir hissəsini ələ keçirir
Kiyev ABŞ-dan M270 MLRS- reaktiv yaylım atəşi sistemi və M142 HIMARS sistemləri istəmişdi. Bu sistemlər 300 km-dək məsafəni vura bilir.
MLRS “bizim gerçəkdən çox ehtiyacımız olan sistemdir”, – Ukraynanın Xarici işlər naziri Dmitro Kuleba ötən həftə Dünya İqtisadi Forumunda deyirdi.
Vaşinqton Ukraynaya verəcəyi silahların Donbas regionunda Rusiya artilleriya bölmələri və qüvvələrinə qarşı istifadə olunacağını gözləyir.
Baydenin “The New York Times”da məqaləsi çıxandan az sonra Rusiya ordu rəsmiləri Moskva yaxınlığındakı İvanovoda nüvə qüvvələrinin təliminin keçirildiyini bəyan ediblər.
Ukrayna qüvvələri bu raket sistemləri vasitəsilə həm Rusiya artilleriyasını aşkarlaya, həm də Severodonetsk kimi qızğın döyüş gedən şəhərlərdə Rusiyanın mövqelərini vura bilərlər.
Rusiya Donbasda özünün dəstəklədiyi separatçıların nəzarətində olmayan ərazilərin ələ keçirilməsi üçün tədricən irəliləyir.
Fevralın 24-də Ukraynanı işğal etməyə başlayan Rusiya Qərbin ağır sanksiyaları ilə üzləşib.