Sloveniyanın Baş naziri Janez Jansa deyir ki, Avropa Birliyi əfqan miqrant axınına imkan verməyəcək. Talibanın Əfqanıstanı yenidən ələ keçirməsi Avropada 2015-ci il miqrasiya böhranının təkrarlanacağı sarıdan qorxulara səbəb olub. O zaman Yaxın Şərqdə müharibə və yoxsulluqdan qaçan 1 milyondan çox insan birlik ərazisinə getmişdi.
“Avropa Birliyi Əfqanıstan üçün hər hansı ‘humanitar’, yaxud miqrasiya dəhlizi açmayacaq. 2015-ci ilin strateji səhvinin təkrarlanmasına imkan verməyəcəyik”, – Jansa avqustun 22-də Twitter-də yazıb.
Sloveniya hazırda rotasiya əsasında AB-nin altı aylıq prezidentidir.
İstisnalar
AB yalnız Əfqanıstanda NATO missiyasına kömək etmiş şəxsləri qəbul edəcək və blokun xarici sərhədini möhkəmləndirəcək, Jansa deyib.
Minlərlə əfqan hazırda ölkədən çıxmaqdan ötrü Kabil aeroportuna üz tutub. Taliban isə əhalini qalmağa çağırır, ümumi amnistiya təklif edir.
Buna da bax: Talibandan ‘qırmızı xətt’ xəbərdarlığı
Əfqanlar sərt şəriət qaydaları, qisasçılıq cəhdlərindən qorxaraq ölkədən çıxmaq istəyirlər. Üstəlik, yoxsulluq, quraqlıq, iqtisadi durumun pisləşməsi də miqrant axınını gücləndirə bilər.
Taliban əsas sərhəd keçid məntəqələrini bağlasa da, AB Əfqanıstandan daha uzunmüddətli miqrasiya təzyiqindən narahatdır.
AB-nin bir sıra ölkələri qaçqınları Əfqanıstana qonşu ölkələrə yerləşdirməyə çağırırlar. Yalnız xarici qüvvələrlə işləmiş, bəzi şəxsi risk yarana biləcək fərdlər istisna sayılır.
Sizin brauzer HTML5-i dəstəkləmir
Türkiyənin 'Taliban'la işbirliyi necə olacaq?
Almaniya, Avstriya
Sentyabrın 26-da federal seçkidən sonra istefa verəcək Almaniya kansleri Angela Merkel AB-ni miqrasiya üzrə koordinasiyalı, “nəzarət altında” addım atmağa çağırıb.
O, avqustun 17-də deyib ki, Əfqanıstandan qaçanlara BMT-nin qaçqınlar üzrə agentliyi ilə koordinasiya şəkildə qonşu ölkələrdə kömək göstərilməlidir.
Avstriyanın Kansleri Sebastyan Kurz avqustun 22-də deyib ki, ölkəsi əfqanları qəbul etməyəcək.
“Mən Avstriyaya daha çox adam qəbul etməliyik fikrində deyiləm, tam əksini düşünürəm”, – o, PULS 4 televiziyasına müsahibəsində deyib.
Kurz Avstriyada yaşayan 40 mindən çox əfqanın “özəlliklə çətin inteqrasiya” problem yaratdığını söyləyib.
“Sonradan inteqrasiya oluna bilməyən adamları qəbul etmək bir ölkə olaraq bizim üçün böyük problemdir”, – Kurz vurğulayıb.
Buna da bax: Yunanıstan Türkiyə ilə sərhəddə 40 kilometrlik hasar çəkib
Yunanıstan, Türkiyə
Yunanıstan və AB üzvü olmayan Türkiyə də Avropaya yeni miqrasiya axınından narahahtdırlar və buna reaksiyanı koordinasiya etməyə başlayıblar.
Türkiyədə 4 milyon suriyalı, 300 min əfqan, eləcə də dünyanın digər yerlərindən miqrant və qaçqınlar yaşayır.
Türkiyə Prezidenti Recep Tayyip Ərdoğan avqustun 19-da deyib ki, ölkəsinin “Avropanın qaçqın anbarı” olmaq öhdəliyi yoxdur.
Türkiyə və Yunanıstan sərhədlərini möhkəmləndirməyə başlayıblar. Türkiyə İranla sərhədini hasarlayır, elektron monitorinq sistemləri quraşdırır.
BMT hazırda Əfqanıstandan kənarda 5 milyon əfqanın yaşadığını bildirir. Onların 90 faizi İranla Pakistanda məskunlaşıb.