Bir neçə il öncə hüquq müdafiəçisi Leyla Yunusun həbsdən onun vasitəsilə göndərdiyi şəxsi məktubları kitab halında nəşr etdirən vəkil Elçin Qəmbərovun özü fevralın 22-də məhkəmə qarşısına çıxarılır. Yarım milyonluq dələduzluqda ittiham olunan Qəmbərovun işinə Bakı Ağır Cinayətlər Məhkəməsində baxılacaq.
Qəmbərovun işində zərərçəkmiş qismində tanınan yenə öz müvəkkili olub. O, keçmiş Milli Təhlükəsizlik Nazirliyinin (MTN) generalı, uzun illər nazirliyin İstintaq Baş İdarəsinə rəhbərlik etmiş Mövlam Şıxəliyevin 2021-ci ilin aprelində həbsindən sonra bir müddət ona vəkillik edib. Cinayət işinin materiallarında iddia olunur ki, vəkil generalı həbsdən buraxdırmaq adı ilə aldadaraq onun ailəsindən yarım milyon manat pul alıb.
Pul nəyə görə verilib
Mövlam Şıxəliyevin ailə üzvləri onun istintaq və məhkəmə dövründə həbsdə olmaması üçün bu pulu verdiyini iddia edir. Yəni bu pul qarşılığında onun barəsində ev dustaqlığı, başqa yerə getməməyə dair iltizam və s. qətimkan tədbirlərindən biri seçilməliydi. Zərərçəkmiş qismində generalın oğlu Elgün Şıxəliyev tanınıb.
General Şıxəliyevlə birlikdə mühakimə olunan, vaxtilə onun tabeliyində çalışmış üç nəfər keçmiş MTN polkovniki – Sahib Ələkbərov, Yasin Məmmədov və Vüsal Ələkbərov barəsində hökm çıxarılana qədər həbs-qətimkan tədbiri seçilməmişdi. Baxmayaraq ki, zərərçəkmişlər dəfələrlə onların həbsini tələb edirdi, Bakı Hərbi Məhkəməsinin hakimləri onlar haqqında həbs qərarı vermirdi. Yalnız hökm elan edilənlə onlar məhkəmə zalında həbs olundu.
Buna da bax: Yalçın İmanov: 'Elçin Qəmbərovun davranışı vəkillik missiyasına ziddir'Kitabı çıxandan sonra vəkil bürosunun rəhbəri təyin edilib
Əvvəllər 15 saylı Vəkil Bürosunun üzvü olmuş Qəmbərov Leyla Yunusla bağlı kitabından bir müddət sonra "Mərkəz" Vəkil Bürosunun rəhbəri təyin edilmişdi. O, 2022-ci ilin iyununda DTX əməkdaşları tərəfindən saxlanılıb. Səbail Rayon Məhkəməsinin qərarı ilə barəsində həbs-qətimkan tədbiri seçilən Qəmbərov elə DTX-nin istintaq təcridxanasında da qalırdı. Avqust ayında o, ev dustaqlığına buraxılıb.
Qəmbərov 2017-ci ildə "Leyla Yunusun parlaqlığı və səfaləti" kitabında onun vasitəsilə həbsdən göndərdiyi şəxsi məktubları, müraciətləri açıqlayıb. O, hüquq müdafiəçisini dostlarına xəyanətdə suçlayır.
Hüquq müdafiəçisi Leyla Yunus və həyat yoldaşı, tarixçi Arif Yunus 2014-cü ildə dələduzluq, vəzifə səlahiyyətlərindən sui-istifadə və başqa əməllərdə suçlanaraq həbs edilib. Leyla Yunus 8 il 6 ay, Arif Yunus isə 7 il azadlıqdan məhrum edilib, 2015-ci ilin dekabrında isə Bakı Apellyasiya Məhkəməsinin qərarı ilə şərti azadlığa buraxılıb. Onlar daha sonra Niderlanda mühacirət ediblər.
Buna da bax: 'Məni Masazırdakı gizli türməyə aparmışdılar. Bağ evidir, içində təcridxana, əsgərlər...'Səid Dadaşbəyli işi
Qəmbərovun adı vaxtilə MTN tərəfindən dövlət çevrilişinə cəhd ittihamı ilə həbs olunan Səid Dadaşbəylinin işində də hallanıb. Dadaşbəylinin həyat yoldaşı iddia edirdi ki, vəkil Qəmbərov onları aldadıb, başqasına çatdırmaq adı ilə pul alıb. Lakin həmin vaxt vəkil onun iddiasını təkzib etmiş, demişdi ki, sadəcə müdafiəçi kimi göstərdiyi xidmətin müqabilində pul alıb, dələduzluqdan söhbət gedə bilməz.
Vəkillər Kollegiyasından AzadlıqRadiosuna bildirilib ki, Qəmbərovun həbsindən sonra onun vəkillik fəaliyyəti dayandırılıb: "Vəkillər Kollegiyası Rəyasət Heyətinin 1 iyul 2022-ci il tarixli qərarı ilə Elçin Qəmbərovun vəkillik fəaliyyəti onun barəsində elan olunacaq hökm qanuni qüvvəyə minənədək dayandırılıb".
Daha bir vəkil istintaqa cəlb olunub
AzadlıqRadiosunun əldə etdiyi başqa bir məlumata görə, hazırda general Şıxəliyevin hüquqlarını müdafiə edən vəkil Arzu Cavadov da sözügedən cinayət işi üzrə istintaqa cəlb olunub. Vəkil Cavadov şahid qismində dindirilib. Qəmbərovun rəhbərliyi dövründə də "Mərkəz" Vəkil Bürosunda çalışan Cavadov indi də elə orada işləyir. Cavadovun həm də general Şıxəliyevin qohumu olduğu bildirilir.
Buna da bax: Həbsdəki MTN generalının 2 milyonluq əmlakı ailəsinə qaytarıldıQəmbərovun oğlu da vəkillik fəaliyyəti ilə məşğuldur. "Kredo" Vəkil Bürosunun üzvü olan Əli Qəmbərov hazırda həm də atasının vəkilidir.
Elçin Qəmbərovun ittiham olunduğu CM-nin 178.4 maddəsində 10 ildən 14 ilə qədər azadlıqdan məhrumetmə cəzası nəzərdə tutulub.
Xatırlatma
2015-ci ilin oktyabrında MTN-dəki əməliyyat nəticəsində nazirliyin 21 vəzifəlisi cinayət məsuliyyətinə cəlb olunub. Sabiq MTN-çilər qanunsuz dinləmələrdə, iş adamlarının əmlaklarını hədə-qorxu ilə əllərindən almaqda, onları qanunsuz şəkildə günlərlə MTN-də saxlamaqda və başqa əməllərdə ittiham olunurdular. MTN generalları Nizami Şirinov və Mövlam Şıxəliyev, eləcə də onların tabeliyində çalışan şəxslər 2021-ci ilin aprelində cinayət məsuliyyətinə cəlb olunublar. 2022-ci ilin sentyabrında Bakı Hərbi Məhkəməsinin hökmü ilə Şıxəliyev haqqında 12 il azadlıqdan məhrumetmə hökmü çıxarılıb. Uzun illər MTN-nin İstintaq Baş İdarəsinə rəhbərlik etmiş Şıxəliyev hökmdən apellyasiya şikayəti verib. Hazırda onun da işinə Bakı Apellyasiya Məhkəməsində baxılır.
2015-ci ilin oktyabrında MTN-də baş verənlərdən sonra bu qurum ləğv edilib və onun bazasında Dövlət Təhlükəsizliyi Xidməti (DTX) yaradılıb.