Azərbaycan Demokratiya və Rifah Partiyasının (ADR) sədri, professor Qubad İbadoğlu ilə eyni cinayət işi üzrə təqsirləndirilən alim Fazil Qasımovun həbsdə saxlanma müddəti uzadılıb. İstintaq dövründə onun barəsində seçilmiş həbs-qətimkan tədbirinin müddəti daha 3 ay artırılıb. Buna noyabrın 17-də Nərimanov rayon Məhkəməsində qərar verilib.
Müstəntiq məhkəmədə deyib ki, F.Qasımovun işi üzrə araşdırmalar hələ davam edir, bundan sonra da aparılası bir sıra istintaq hərəkətləri var. O vurğulayıb ki, istintaq gedən dövrdə F.Qasımovun həbsdə saxlanması məqsədəuyğundur. Bu üzdən prokuror həbs-qətimkan tədbirinin daha 3 ay uzadılmasına təqdimat verib.
Təqsirləndirilən alim və vəkili prokurorun təqdimatına etiraz ediblər. Onlar bildiriblər ki, həbsdə saxlanmadan da istintaq davam edə bilər.
Amma hakim Gültəkin Əsədova təqdimatı təmin edərək F.Qasımov haqqında həbs-qətimkan tədbirini gələn ilin fevralınadək uzadıb.
Q.İbadoğlu
Bir gün öncə - noyabrın 16-da Nərimanov rayon Məhkəməsində Qubad İbadoğlu haqqında da eyni qərar verilib. Onun haqqında təqdimata hakim Hafiz Kamranov baxıb və həbs müddətini 3 ay artırıb.
Məhkəmədə çıxış edən Q.İbadoğlu 1995-2000-ci illərdə Azərbaycanın baş prokuroru, daha sonra isə müxtəlif ölkələrdə səfir olan Eldar Həsənovun, keçmiş MTN generalı Akif Çovdarovun aqibətini yada salıb: "Hətta hörümçək tor düzəldəndə belə, ora kimin düşəcəyini bilmir. Vaxt vardı, Eldar Həsənovun, Akif Çovdarovun, Hacı Məmmədovun sözünün qarşısında söz deyən yox idi. Amma görün ki, aqibətləri necə oldu! Nəticə çıxarın...".
Təqsirləndirilən professor vurğulayıb ki, Amerika, Britaniya universitetlərində dərs deyərkən bu dövlətlərin vətəndaşı olmaq imkanı vardı, ancaq bunu istəməyib, Azərbaycan vətəndaşı olmağı üstün tutub: "Mən yaxşı vətəndaşam. Amerikada, İngiltərədə işləmişəm. Orada qalıb, o dövlətlərin vətəndaşı ola bilərdim. Amma mən öz ölkəmin vətəndaşı olmaq istəyirəm. Orada ikili vətəndaşlıqla da yaşaya bilərdim. Mən hesab edirəm ki, iki ölkənin vətəndaşı olmaqdansa, öz ölkənin yaxşı vətəndaşı olmalısan".
Sizin brauzer HTML5-i dəstəkləmir
Qubad İbadoğlu kimdir və nə üçün həbs edilib?
Xatırlatma
Q.İbadoğlu iyulun 23-də həyat yoldaşı ilə birlikdə avtomobildə gedərkən onu Baş Mütəşəkkil Cinayətkarlıqla Mübarizə İdarəsinin əməkdaşları saxlayıb. Həmin gün axşam onun adına olan, amma ofis kimi istifadə edilən mənzildə axtarış aparılıb və 20 min dollar pul tapıldığı iddia edilib. İddiaya görə, həmin pulların bir hissəsi saxta əskinaslar olub.
Bu əsasla da Q.İbadoğluya qarşı Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.
Təqsirləndirilən professor sözügedən pulların ora öncədən yerləşdirildiyini və bu ittihamın əsassız olduğunu, siyasi sifarişlə həbs edildiyini bildirib.
İstintaqın gedişində - avqustun 25-də Q.İbadoğluya CM-in 167-3.1 (dini ekstremist materialları hazırlama, saxlama, yayma) maddəsi ilə yeni ittiham verilib. İqtisadçı bu ittihamın da absurd olduğunu söyləyərək ifadə verməkdən imtina edib.
Türkiyədə yaşayan və orada universitetdə çalışan azərbaycanlı alim F.Qasımov isə avqustun 6-da İstanbulda saxlanılaraq Azərbaycana gətirilib. Avqustun 8-də Nərimanov rayon Məhkəməsinin qərarı ilə onun haqqında həbs-qətimkan tədbiri seçilib. Ona qarşı da CM-in 204.3.1 maddəsi ilə ittiham irəli sürülüb.