Zaporojye AES-də son işlək reaktor dayandırılır

Ukraynanın Zaporojye AES-in operatoru Energoatom son işlək reaktorun da dayandırıldığını deyir. Şirkət sentyabrın 5-də yaydığı bəyanatda qeyd edir ki, “işğalçı Rusiya qüvvələri Zaporojye AES yaxınlığındakı ərazini intensiv atəşə tutmaqdadır”.

Atışmanın səbəb olduğu yanğın nəticəsində Zaporojye AES-i Ukraynanın əsas elektrik şəbəkəsinə birləşdirən elektrik xətti söndürülüb, məlumatda vurğulanır.

Rusiyanın TASS xəbər agentliyi sentyabrın 5-də səhər Enerhodar şəhərində üç partlayış eşidildiyini xəbər verir. Zaporojye AES məhz bu şəhərdə yerləşir.

***

Ukraynanın Zaporojye Atom Elektrik Stansiyasının (AES) operatoru Energoatom deyib ki, stansiyada altı reaktordan yalnız biri işləyir. Belə ki, Birləşmiş Millətlər Təşkilatının (BMT) iki nəzarətçi müfəttişinin ərazidə yerləşdirilməsinə baxmayaraq, Rusiya tərəfindən işğal olunmuş stansiyayla bağlı qorxu və narahatlıq hələ də qalmaqdadır.

Avropanın ən böyük nüvə stansiyası ətrafında gedən döyüşlər nüvə fəlakəti qorxusunu artırıb.

Rusiyanın TASS dövlət xəbər agentliyi sentyabrın 5-də bildirib ki, Zaporojye zavodunun yerləşdiyi Enerhodar şəhərində üç partlayış səsi eşidilib.

"Hazırda Ukraynanın enerji sistemini elektrik enerjisi ilə təmin edən və Zaporojye zavodunun öz tələbatını təmin edən yalnız 6-cı enerji bloku fəaliyyətdədir", - Enerhoatom sentyabrın 5-də verdiyi bəyanatda bildirib və əlavə edib ki, stansiya “radiasiya və yanğın təhlükəsizliyi qaydalarının pozulması” riskləri fonunda işini davam etdirir.

Hesabat gözlənir

Rusiya Ukraynanı zavodu güc yolu ilə geri almaq cəhdində ittiham edir, Kiyev iddiaları rədd edir.

Stansiya ətrafında gedən döyüşlər Beynəlxalq Atom Enerjisi Agentliyini (BAEA) keçən həftə əraziyə missiya göndərməyə vadar edib.

Missiyanın bir neçə üzvü sentyabrın 3-də, vəziyyətə nəzarət etmək üçün BAEA-nın iki üzvü ərazidə qalıb. TASS missiyaya qatılmış . rusiyalı ekspertə istinadən xəbər verir ki, BMT-nin nəzarət orqanının yaxın günlərdə səfəri ilə bağlı hesabat açıqlayacağı gözlənilir.

Rusiyanın Ukraynaya qarşı yeddinci aydır davam edən müharibəsi enerji qiymətlərini artırmaqdadır. Qərb Moskvanı qaz və neftdən silah kimi istifadə etməkdə suçlayır.

“Rusiya artıq etibarlı enerji tərəfdaşı deyil”

Həftəsonu Ukrayna Prezidenti Volodimir Zelenski qış ayları yaxınlaşdıqca Rusiyanın həlledici enerji zərbəsi hazırlamasıyla bağlı xəbərdarlıq səsləndirib. Almaniya kansleri Olaf Şolts isə “Rusiya artıq etibarlı enerji tərəfdaşı deyil” deyə açıqlama verib.

Sentyabrın 5-də Rusiyanın “Şimal axını 1” boru kəmərini qeyri-müəyyən müddətə bağladığını elan etməsi ilə Avropada qazın qiyməti 30% bahalaşıb.

Baltik dənizinin dibi ilə Rusiyadan Almaniyaya uzanan bu kəmər Avropaya ixrac olunan qazın təxminən üçdə birini təmin edir. Artıq cəmi 20 faiz gücüylə işləyən boru kəməri keçən həftə təmirə bağlanıb, Rusiya bunu neft sızmasıyla izah edib.

“Reuters” xəbər agentliyinin məlumatına görə, Aİ ölkələrinin energetika nazirləri sentyabrın 9-da görüşməlidir. Onlar qazın qiymətinə məhdudiyyətləri və enerji bazarı iştirakçıları üçün təcili kredit xətləri də daxil olmaqla, artan enerji qiymətlərini cilovlamaq variantlarını müzakirə edəcəklər.

Xerson yaxınlığında kəndin geri alındığı bildirilir

Sentyabrın 4-də Prezident Zelenskinin əsas köməkçisi Facebook-da Ukrayna əsgərlərinin Xerson yaxınlığındakı bir kənd üzərində dövlət bayrağı ucaldan yerdə fotosunu paylaşıb, kəndin Rusiya işğalçı qüvvələrinin əlindən alındığını iddia edib.

Kirilo Timoşenko Ukrayna bayrağını dirəyə asan üç əsgərin fotosunun altında "Vısokopilya. Xerson vilayəti. Ukrayna. Bu gün" yazıb.

Sentyabrın 4-də Rusiyanın Ukraynanın cənubundakı liman şəhəri Nikolayevi atəşə tutması barədə məlumatlar gəlib. Şəhərin meri Oleksandr Senkeviç tibb müəssisəsinin və bəzi yaşayış binalarının zədələndiyini deyib, lakin hər hansı itki barədə məlumat verməyib.