Ruslan Bəşirlinin vəkili Osman Kazımov şahid siyahılarının müdafiə tərəfinə verilməsi, işə dair bütün sübut növlərinin məhkəməyə təqdim olunması barədə vəsatət qaldırdı. Həmin sübutlardan biri də Ruslan Bəşirlinin Gürcüstanda Ermənistan xüsusi xidmət orqanı əməkdaşı olduğu bildirilən şəxslə söhbətini əks etdirən kasetdir. Bu kasetlər dönə-dönə yerli telekanallar tərəfindən göstərilib. Dövlət ittihamçısı bütün sübutların məhkəmə prosesinin gedişində təqdim olunacağını bildirdi.
Vəkillər və təqsirləndirilən şəxslər cinayət işinin məhkəməyə verilməsini qeyri-mümkün sayıblar.
Məhkəmə prosesini Birləşmiş Ştatların Azərbaycandakı səfirliyinin iqtisadi və siyasi məsələlər üzrə müşaviri Lora Şaybi də müşahidə edirdi. Xanım Şaybi deyir ki, səfirlik bu məhkəmə prosesini diqqətdə saxlayır və o, bütün prosesi izləyəcək.
Martın 31-də "Human Rights Watch" insan haqları təşkilatı da Azərbaycan hökumətini üç gənc müxalifətçini ədalətlə mühakimə etməyə çağırıb. Təşkilatın Avropa və Orta Asiya Departamentinin icraçı direktoru Holi Kartnerin dediyinə görə, "Yeni Fikir" liderlərinin həbsinin mahiyyəti və vaxtı bu işin siyasi motivli olduğunu göstərir: "Bu iş həmçinin 2005-ci ilin saxta parlament seçkilərinin üzərinə daha dərin kölgə salır".
Təşkilatın Brüssel ofisinin nümayəndəsi Culiet Ladore: "Azərbaycan hökuməti siyasi səbəblərdən müxalifət nümayəndələrinə qarşı ittihamlar irəli sürməklə, onlara təzyiq göstərməklə tanınır. Buna görə biz narahatıq ki, bu üç gənc ədalətlə mühakimə olunmayacaq".
"Yeni Fikir" Gənclər Təşkilatının sədri Ruslan Bəşirli Cinayət Məcəlləsinin 278-ci maddəsi – dövlətin konstitusion quruluşunu zorla dəyişdirməyə cəhddə və 192-ci maddəsi – qanunsuz sahibkarlıq fəaliyyəti ilə məşğul olmaqda ittiham olunur. Ruslan Bəşirli ötən il parlament seçkiləri ərəfəsi – avqustun 4-də həbs olunub. "Yeni Fikir" sədrinin müavinlərinə də eyni ittihamlar irəli sürülüb.