Xəbərlər
MN: Fərrux kəndi və ətraf yüksəkliklərdəki mövqelərdə heç bir dəyişiklik baş verməyib
Azərbaycan ordusunun Fərrux ərəzisindən çıxması barədə Rusiya Müdafiə nazirliyinin yaydığı məlumatdan bir qədər sonra Azərbaycan Müdafiə Nazirliyi bu məlumatı təkzib edib. Nazirliyin martın 27-də yaydığı məlumatda deyilir ki, Azərbaycan Ordusunun Fərrux kəndi və ətraf yüksəskliklərdəki mövqelərində heç bir dəyişiklik baş verməyib.
"Azərbaycan Ordusunun ölkəmizin suveren ərazilərinin tərkib hissəsi olan Fərrux kəndi və ətraf yüksəkliklərdəki mövqelərində heç bir dəyişiklik baş verməyib. Azərbaycan Ordusunun bölmələrinin həmin mövqelərdən geri çəkilməsi haqqında məlumat həqiqəti əks etdirmir. Ordumuz əməliyyat şəraitinə tam nəzarət edir".
Nazirlik həmçinin Rusiya tərəfinin açıqlamasında atəşkəsin guya Azərbaycan tərəfindən pozulması barədə verilmiş məlumatın da həqiqətə uyğun olmadığını və Azərbaycan hərbçiləri arasında yaralanma halı qeydə alınmadğını bildirir.
"Bir daha xatırlatmaq istərdik ki, Azərbaycan ərazisində “Dağlıq Qarabağ” adlı inzibati ərazi vahidi yoxdur. Rusiya Müdafiə nazirliyinin 26 və 27 mart tarixli açıqlamalarında “Dağlıq Qarabağ” ifadəsinin işlədilməsi Azərbaycan Respublikasının beynəlxalq birlik, o cümlədən Rusiya Federasiyası tərəfindən tanınmış və qəbul edilmiş ərazi bütövlüyünə qarşı hörmətsizlikdir"
Müdafiə Nazirliyi Rusiyanın Müdafiə Nazirliyinə xatırlafır ki, fevral ayında Azərbaycanla və Rusiya prezidentləri arasında Mütəfiqlik Bəyannaməsini yara salır.
"Rusiya Federasiyası Müdafiə Nazirliyinə xatırlatmaq istərdik ki, 2022-ci il 22 fevral tarixində iki ölkə prezidentləri tərəfindən imzalanmış Müttəfiqlik qarşılıqlı fəaliyyəti haqqında Bəyannamənin birinci bəndində qeyd olunur ki, “Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar”.”.
Nazirliyin açıqlamasında daha sonra bəyannamənin 18-ci bəndini də bir daha xatırladılır. Qeyd olunur ki, Rusiya Müdafiə Nazirliyinin bu açıqlamaları Rusiya prezidenti tərəfindən imzalanmış bəyannaməyə hörmətsizlikdir.
"...18-ci bəndinə əsasən, Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, qarşı mübarizədə və onların neytrallaşdırılmasında səylərini birləşdirirlər. Rusiya Federasiyası Müdafiə Nazirliyi bu açıqlaması ilə eyni zamanda Rusiya Federasiyasının Prezidenti, Rusiya Silahlı Qüvvələrinin Ali baş komandanı Vladimir Vladimiroviç Putin tərəfindən də imzalanmış sözügedən bəyannaməyə də hörmətsizlik nümayiş etdirir"
Müdafiə Nazirliyi bir daha Rusiya Müdafiə nazirliyinə xatırladır ki, Azərbaycanın Xocalı rayonunda "Furux" adlı kənd yoxdur.
"Qeyd edilən kəndin adı FƏRRUXDUR. Ümid edirik ki, növbəti açıqlamalarda kəndin adı düzgün formada göstəriləcəkdir" Azərbaycan Müdafiə Nazirliyinin açıqlamasında vurğulanır.
***
Azərbaycan Fərruxdan öz bölmələrini çıxarıb-Rusiya Müdafiə Nazirliyi
"Danışıqların nəticələrinə əsasən, Azərbaycan tərəfi FURUX (Fərrux -AR.) yaşayış ərazisindən öz bölmələrinin çıxarılmasını həyata keçirib".
Martın 27-də Rusiya Müdafiə Nazirliyinin yaydığı məlumatda belə deyilir.
Nazirliyin məlumatında bir də atəşkəsin iki dəfə Azərbaycan silahlı qüvvələri tərəfindən pozulduğu vurğulanır. Həmçinin qeyd olunur ki, atışma nəticəsində hər iki tərəfdən iki nəfər yaralanıb.
Azərbaycan Müdafiə Nazirliyinin hələkə bu açıqlamaya münasibəti bəlli deyil.
***
"Azərbaycan Respublikası Müdafiə Nazirliyi Rusiya Federasiyası Müdafiə Nazirliyinin 2022-ci il 26 mart tarixli həqiqəti əks etdirməyən və birtərəfli açıqlaması ilə bağlı təəssüfünü bildirir".
Azərbaycanın müdafiə naziriyi Rusiya müdafiə nazirliyinin martın 26-da yaydığı məlumata verdiyi reaksiyada belə deyilir.
Məlumatda martın 25-də iki ölkənin müdafiə nazirləri telefon danışığı zamanı Rusiya sülhməramlı kontingentinin müvəqqəti yerləşdiyi Azərbaycan əraziləri boyunca yaranmış vəziyyət müzakirə edilib. Söhbət zamanı Azərbaycan tərəfi bəyan edib ki, məntəqələrdə mövqelərin və dislokasiya yerlərinin dəqiqləşdirilməsi aparılır.
"Lakin buna baxmayaraq martın 26-sı səhər saatlarında qeyri-qanuni erməni silahlı dəstələrinin üzvləri Azərbaycan Ordusunun bölmələrinə qarşı təxribat törətməyə cəhd göstərib. Dərhal görülən tədbirlər nəticəsində qeyri-qanuni erməni silahlı dəstələrinin üzvləri geri çəkilməyə məcbur edilib".
Müdafiə Nazirliyi bildirir ki, Azərbaycan 2020-ci il 10 noyabr tarixli üçtərəfli bəyanata sadiqdir və onun heç bir müddəasını pozmayıb.
"Təəssüflə qeyd edirik ki, həmin bəyanatın 4-cü bəndinə uyğun olaraq, Ermənistan ordusunun qalıqlarının və qeyri-qanuni erməni silahlı dəstələrinin Azərbaycan ərazilərindən tam olaraq çıxarılması indiyə qədər icra edilməmişdir. Buna görə bəyanatın müddəalarını pozan Azərbaycan deyil, məhz Ermənistandır".
Nazirliyin açıqlamasında bildirir ki, Rusiya Federasiyası Müdafiə Nazirliyinin bu açıqlaması ikitərəfli əlaqələrin mahiyyətinə və 2022-ci il 22 fevral tarixində iki ölkə arasında imzalanmış müttəfiqlik qarşılıqlı fəaliyyəti haqqında Bəyannaməyə ziddir.
Azərbaycan ərazisində “Dağlıq Qarabağ” adlı inzibati ərazi vahidi yoxdur. Açıqlamada qeyd edilən kəndin adı Furux deyil, Fərruxdur".
Nazirlik bildirir ki, "yuxarıda qeyd edilənlərlə əlaqədar Azərbaycan Respublikası Müdafiə Nazirliyi Rusiya Federasiyası Müdafiə Nazirliyini üçtərəfli bəyanatın müddəalarına uyğun olaraq Ermənistan ordusunun qalıqlarının və qeyri-qanuni erməni silahlı dəstələrinin Azərbaycanın beynəlxalq birlik tərəfindən tanınmış ərazilərindən tam olaraq çıxarılmasını təmin etməyi, Azərbaycan silahlı qüvvələrinin ölkəmizin suveren əraziləri daxilində hərəkətini təhrif edilmiş formada qələmə verməməyi, “Dağlıq Qarabağ” ifadəsi işlətməməyi və Azərbaycan ərazilərinin adını düzgün olaraq göstərməyi xahiş edir"-deyə Azərbaycan Müdafiə Nazirliyinin bəyanatında deyilir.
***
Rusiya müdafiə nazirliyinin məlumatından sonra Rusiyanın xarici işlər nazirliyi də tərəfləri təmkinli olmağa çağırıb.
"Biz tərəfləri təmkin nümayiş etdirməyə və mövcud üçtərəfli sazişlərə ən yüksək səviyyədə ciddi əməl olunmasını təmin etməyə çağırırıq"
****
"Martın 24-dən 25-dək Azərbaycan Respublikasının silahlı qüvvələri Rusiya, Azərbaycan və Ermənistan liderlərinin 9 noyabr 2020-ci il tarixli üçtərəfli bəyanatının müddəalarını pozaraq, Rusiya sülhməramlı kontingentinin məsuliyyət zonasına daxil olub. Dağlıq Qarabağ ərazisində müşahidə məntəqəsi qurub. “Bayraktar-TB 2” tipli pilotsuz uçuş aparatı Furux (Fərux-A.) yaşayış məntəqəsi ərazisində Dağlıq Qarabağ silahlı birləşmələrinin bölmələrinə 4 zərbə endirib".
Belə bir məlumat martın 26-da Rusiya Müdafiə Nazirliyinin Qarabağdakı Rusiya sülhməramlı kontingentinin fəaliyyəti haqqında dərc etdiyi bülletenində yer alıb.
Məlumatda deyilir ki, "hazırda Rusiya sülhməramlı kontingentinin komandanlığı vəziyyətin həlli və qoşunların ilkin mövqelərinə qaytarılması üçün tədbirlər görür. Qoşunların çıxarılması üçün Azərbaycan tərəfinə müraciət göndərilib".
Xatırlatma
Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi. Amma 2020-ci ildə İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağda Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.
Bütün xəbərləri izləyin
CPJ AzadlıqRadiosunun jurnalistini azadlığa buraxmağa çağırır
Nyu-Yorkda yerləşən Jurnalistləri Müdafiə Komitəsi (CPJ) Azərbaycan hakimiyyətini iqtisadçı və AzadlıqRadiosunun jurnalisti Fərid Mehralızadəni dərhal azad etməyə çağırır. F.Mehralızadə maydan bəri valyuta qaçaqmalçılığı ittihamı ilə həbsdədir. Oktyabrın 30-da AzadlıqRadiosu bəyanat yayaraq Mehralızadənin azadlığa buraxılmasına çağırıb. Radio onun məqalələrini təhlükəsizliyinə görə istinad etmədən dərc edirdi.
"Azərbaycan BMT-nin İqlim Dəyişikliyi üzrə COP29 konfransına ev sahibliyi etməyə hazırlaşarkən ən azı 15 jurnalist potensial uzunmüddətli həbs cəzaları ilə üzləşir. Fərid Mehralızadənin işi bir daha nümayiş etdirir ki, tənqidi fikirləri olanlar absurd dərəcədə asanlıqla ölkədəki amansız repressiyalara tuş gələ bilirlər", – CPJ-nin Avropa və Mərkəzi Asiya üzrə proqram koordinatoru Gülnoza Səid bildirib: "Azərbaycan hökuməti COP29-dan əvvəl Mehralızadəni və bütün digər haqsız yerə həbs edilmiş jurnalistləri azad edə bilməsə, beynəlxalq qınaqla üzləşməlidir".
Mayın 30-da mülkigeyimlilər Mehralızadəni küçədə tutub başına torba keçirərək zorla maşına mindiriblər. Polis əməkdaşları onun evindən kompüterini, mobil telefonlarını və avtomobilini də müsadirə ediblər.
İyunun 1-də məhkəmə Mehralızadə barəsində həbs-qətimkan tədbiri seçib. O, korrupsiya araşdırmaları ilə tanınan "AbzasMedia" nəşrinə qarşı valyuta qaçaqmalçılığı işi çərçivəsində ittiham olunub. Həm "AbzasMedia", həm də Mehralızadə onun bu nəşrlə əməkdaşlığını təkzib ediblər.
Mehralızadə AzadlıqRadiosu üçün iqtisadi mövzuları işıqlandırırdı. Radionun vebsaytı Azərbaycanda bloklanıb. Jurnalistin həyat yoldaşı Nərgiz Muxtarova CPJ-yə bildirib ki, o, jurnalistikasına və müstəqil mediaya müsahibələrində hökumətin siyasətini tənqid etdiyinə görə həbs olunub.
Avqustda hakimiyyət Mehralızadə və "AbzasMedia" jurnalistlərinə qarşı əlavə yeddi iqtisadi cinayət ittihamı irəli sürüb. Bu ittihamlar üzrə 12 ilədək həbs nəzərdə tutulur.
Azərbaycan 11-22 noyabrda COP29-a ev sahibliyi edəcək. Son bir ildə ölkədə Qərb donorlarından maliyyə vəsaiti almaqda ittiham olunan 14 jurnalist həbsə atılıb. Bütün bunlar Azərbaycanla Qərb arasında münasibətlərin geriləməsi fonunda baş verir.
Azərbaycan hakimiyyəti isə ölkədə siyasi motivli həbslərin olmadığını, fərdlərin konkret cinayətlərə görə saxlanıldığını deyir.
HRW: Hökumətlər mədən yanacağından istifadəni kəskin azaltmalıdır
COP29-a qatılan hökumətlər mədən yanacağından imtina yoluyla istixana qazlarının atmosferə atılmasının həcmini kəskin azaltmalıdır. İnsan haqlarını izləyən təşkilat – "Human Rights Watch" (HRW) öz bəyanatında bunu dilə gətirib.
Milli iqlim planlarının 1.5 dərəcəyə uyğunlaşdırılmasının önəmini vurğulayan həmin insan haqları qurumunun çevrə və insan haqları üzrə direktoru Riçard Pirshaus deyib ki, "kömür, neft və qaz hasilatının artması insan sağlamlığına zərər vurur, belə mədənlərə yaxın yaşayanların haqlarının pozulmasına gətirib çıxarır, çevrənin məhvini sürətləndirir".
O, 11-22 noyabrda Bakıda qlobal iqlim konfransına qatılacaq hökumətlərə səslənərək bildirib ki, iştirakçılar Azərbaycanın ev sahibliyindən yararlanaraq iqlim böhranının aradan qaldırılması və insan haqlarının qorunması istiqamətində səylərin arxa plana atılmasına imkan verməməlidir.
Azərbaycan prezidentinin xarici məsələlər üzrə köməkçisi Hikmət Hacıyev neft ölkələrinə "yararsız ev sahibləri" damğasının vurulmasını riyakar oyun adlandırıb. Azərbaycan hakimiyyəti ölkədə siyasi motivli həbslərin olmadığını, fərdlərin konkret cinayətlərə görə saxlanıldığını bildirir.
Koalisiya hökumətinin dağılması Almaniyada yeni seçkilərə yol açacaq?
Almaniyanın koalisiya hökuməti dağıldı. Olaf Şolts martda növbədənkənar seçkilər keçirmək üçün hökumətə güvən məsələsini parlamentdə səsverməyə çıxaracaq. AzadlıqRadiosu bu xəbəri yayarkən DW-nin bilgisinə dayanır. "İşıqfor koalisiyası" kimi tanınan hökumətə sosial-demokratlar, azad demokratlar və yaşıllar daxil idi.
Bir müddət əvvəl O.Şolts azad demokratlardan olan maliyyə naziri Kristian Lindneri istefaya göndərib. Buna azad demokratların iqtisadiyyata aid proqram sənədi səbəb olub. Koalisiya üzrə tərəfdaşların sərt tənqidinə məruz qalan sənəddə iqlim tələblərinin zəiflədilməsi ilə yanaşı, şirkətlərin vergi yükünün, subsidiya və sosial ödənişlərin azaldılması nəzərdə tutulurdu.
"Məntiqəuyğun, amma gərəksiz"
Lindner isə koalisiya hökumətinin dağılmasında Şoltsu günahlandırır. Növbədənkənar seçkilərin keçirməsini təklif edən sabiq nazir ölkənin 2024-cü il büdcəsini qəbul etməyə və seçkilərədək keçid hökumətində qalmağa razılığını vermişdi.
Yaşılları təmsil edən vitse-kansler Robert Habek maliyyə nazirinin istefaya göndərilməsini "məntiqəuyğun, amma gərəksiz" addım adlandırıb.
Növbədənkənar seçkilər baş tutmasa, indiki hökumət gələn il sentyabrın 25-dək hakimiyyətdə olacaq.
Almaniya prezidenti parlamenti iki halda buraxa bilər: Kansler deputatların dəstəyini itirəndə və Bundestaq səsvermə nəticəsində hökumətə güvənməyəndə. Almaniyanın müasir tarixində birinci hal baş verməsə də, ikinci hal üç dəfə gerçəkləşib: 1972-ci, 1983-cü və 2005-ci illərdə.
ABŞ-da respublikaçılar Senata nəzarəti geri aldılar
ABŞ-da Respublikaçılar partiyası noyabrın 5-də keçirilən seçkilər zamanı azı 52 yer qazanaraq Senata nəzarəti bərpa edib, - "The Associated Press" xəbər verir.
Senatorların üçdə biri yenidən seçilib. Son məlumatlara görə, respublikaçılar Qərbi Virciniya, Montana və Ohayo ştatlarında qalib gələrək demokratların yerlərini tutublar. Səslərin sayılması davam edir, altı ştatda nəticələr hələ açıqlanmayıb. Proqnozlara görə, respublikaçıların onlardan ən azı ikisində qazanmaq şansı var.
Konqresin yuxarı palatasında - hər ştatdan iki nümayəndənin seçildiyi Senatda ümumilikdə 100 yer var. Hər iki ildən bir Senatın üçdə biri yenilənir. Son dörd ildə Senata demokratlar nəzarət edirdi.
Nümayəndələr Palatasına seçkilərin nəticələri də daxil olmaqdadır. Aşağı palata iki ildən bir tam yenilənir: 435 yerin hamısı. İndi orada çoxluq respublikaçılara məxsusdur və onlar bunu qorumaq niyyətindədirlər. Hazırda, son səs sayımına görə, onların 201, demokratların isə 182 yerləri var. Daha 51 yer üzrə nəticələr gözlənilir. Kimin çoxluğa sahib olacağı, hələlik, qeyri-müəyyəndir.
ABŞ prezident seçkilərində də respublikaçı namizəd Donald Tramp qalib gəlib. Respublikaçılar Konqresin hər iki palatasına nəzarəti ələ keçirsələr, onun öz siyasətini həyata keçirməsi xeyli asanlaşacaq.
Müsavat üzvü şərti cəza ilə həbsdən buraxıldı: 'Heç kim adımı çəkməyib'
Müsavat Partiyasının üzvü, uzun illər Almaniyada siyasi mühacir həyatı yaşamış Mehdi Xəlilbəyli 9 ay həbsdə saxlanandan sonra noyabrın 6-da şərti cəzayla azadlığa çıxıb. Səbail Rayon Məhkəməsinin hökmüylə ona, 2 il sınaq müddəti olmaqla, 3 il 2 ay 29 günlük şərti cəza verilib.
M.Xəlilbəyli 2003-cü ilin oktyabrında Azərbaycanda prezident seçkisi ilə əlaqədar etirazlar vaxtı yaşanan hadisələrə görə suçlanır. Ona Cinayət Məcəlləsinin 220-ci (kütləvi iğtişaşlarda iştirak), 221-ci (xuliqanlıq) və 315-ci (hakimiyyət nümayəndəsinə qarşı zor tətbiqi) maddələrilə ittiham verilib. Uzun illər həmin maddələrlə axtarışda olan M.Xəlilbəyli bu ilin əvvəlində Azərbaycana gələrkən, hava limanında saxlanılıb.
M.Xəlilbəylinin işində 13 nəfər zərərçəkmiş qismində tanınıb. Onların arasında bir neçə ildir fəaliyyəti dayandırılmış “Lider” telekanalının əməkdaşı Sahil Kərimli də var. Cinayət işinin materiallarında iddia olunur ki, 2003-cü ildə sözügedən hadisələr zamanı həmin şəxslər xəsarət alıblar.
M.Xəlilbəyli özünü təqsirli bilmir. Noyabrın 6-da hökmdən öncə son sözündə də deyib ki, 4 ay sürən məhkəmə boyunca heç kim əleyhinə ifadə verməyib: “Əgər kimsə mənim hansısa cinayətdə iştirakım barədə nəsə deyibsə, adım keçibsə, nə cəza versəniz, razıyam. Qanun qarşısında boynumuz qıldan incədir. Heç kim mənim adımı çəkməyib. Xahiş edirəm, ədalətli qərar qəbul edəsiniz”.
O, məhkəmə iclaslarından birində deyib ki, artıq Azərbaycanda yaşamaq istəyir, Almaniyadan da bu üzdən qayıdıb.
Xatırlatma
Müsavat Partiyası Avropa Koordinasiya Mərkəzinin (AKM) üzvü olan M.Xəlilbəyli 2019-cu ildə Almaniyada qanunsuz miqrasıya hallarının təşkili (mühacir alveri) ilə bağlı araşdırmalar çərçivısində tutulmuş, 2020-ci ilin yanvarında azadlığa buraxılmışdı.
2003-cü ilin oktyabr hadisələrindən sonra Azərbaycanda kütləvi həbslər yaşanmışdı. Həbs olunanlar arasında Müsavat Partiyasının keçmiş başqanı Arif Hacılı, Ümid Partiyasının sədri İqbal Ağazadə, “Yeni Müsavat” qəzetinin baş redaktoru Rauf Arifoğlu və digərləri vardı.
Bələdiyyə seçkiləri gələn ilə qaldı
Azərbaycanda bələdiyyə seçkilərinin dəqiq tarixi noyabrın axırında açıqlanacaq.
"Turan"ın məlumatına görə, bunu noyabrın 6-da Mərkəzi Seçki Komissiyasının (MSK) iclasında qurumun rəhbəri Məzahir Pənahov deyib.
Onun sözlərinə görə, istənilən halda seçkilərin gələn il yanvarın 25-dən sonra keçirilməsi daha məqsədəuyğundur.
Azərbaycanda bu ilin sonunda bələdiyyə seçkilərinin keçirilməsi gözlənirdi. Mövcud qanunvericiliyə görə, seçkilər səsverməyə azı 60 gün qalmış elan edilməlidir.
Azərbaycanda son bələdiyyə seçkiləri isə 2019-cu il dekabrın 23-də keçirilib. Seçki Məcəlləsinə görə, bələdiyyələrin səlahiyyəti 5 ildir və bu müddətdən gec olmayaraq seçki keçirilməlidir. Bəzi siyasi təhlilçilər və hüquqşünaslar bələdiyyə seçkilərinin vaxtında keçirilməməsini qanunsuz sayırlar.
Milli Məclisin bəzi üzvləri isə bu barədə tənqidlərə cavab verərkən bu gecikməni noyabrın 11-dən 22-nə kimi Bakıda keçiriləcək BMT İqlim Konfransı (COP29) ilə izah ediblər.
Üstəlik, bu il bəzi bələdiyyələrin birləşdirilməsi ilə bağlı qanun layihəsi də hazırlanıb. Milli Məclisin birinci oxunuşda qəbul etdiyi layihəyə əsasən, Azərbaycanda 1 min 400 bələdiyyənin birləşdirilməsi yolu ilə ölkə ərazisində onların ümumi sayının 684-ə endirilməsi nəzərdə tutulub.
Xanımı Polad Aslanovun cərimə otağına salındığını deyir
xeberman.com saytının həbsdə olan rəhbəri Polad Aslanovun 15 saylı cəzaçəkmə müəssisəsinə köçürüldükdən sonra cərimə otağına (kars) salındığı bildirilir.
Bu barədə onun həyat yoldaşı Gülmira Aslanova məlumat verib.
G.Aslanovanın sözlərinə görə, Penitensiar Xidmətdən bunu həyat yoldaşının aclıq aksiyası keçirdiyi üçün təcrid vəziyyətdə olması zəruriyyəti ilə izah ediblər. Onun iddiasına görə, amma Xidmətdən vurğulanıb ki, sanitar hissəsində yerin olmadığından belə bir tədbir görülüb.
G.Aslanova isə düşünür ki, P.Aslanovu aclıq aksiyası keçirdiyinə görə cəzalandırırlar.
O, həmçinin qeyd edib ki, noyabrın 6-da səhər ərinin vəziyyətini öyrənmək üçün cəzaçəkmə müəssisəsinə getsə də, onunla görüşə icazə verilməyib.
P.Aslanovun noyabrın 4-dən siyasi məhbuslara azadlıq tələbi ilə aclıq elan etdiyi bildirilir. Yaxınlarının sözlərinə görə, bundan sonra o, 1 saylı Cəzaçəkmə Müəssisəsindən 15 saylı Cəzaçəkmə Müəssisəsinə köçürülüb.
Hələlik, bütün bu deyilənlərə Penitensiar Xidmət və başqa rəsmi qurumlardan münasibət almaq mümkün olmayıb.
P.Aslanov 2019-cu ilin iyun ayında saxlanılıb. O, Cinayət Məcəlləsinin 274-cü (dövlətə xəyanət) maddəsi ilə həbs edilərək 16 il azadlıqdan məhrum edilib.
Aslanov ittihamları qəbul etmir və həbsini jurnalist fəaliyyəti ilə əlaqələndirir. Sonradan Ali Məhkəmə Aslanovun həbs müddətini 13 ilə qədər azaldıb.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.
Gürcüstan məhkəməsi 14 məntəqədə səsvermə nəticələrinin ləğvi ilə bağlı müraciəti rədd edib
Noyabrın 6-da Gürcüstanın Qori şəhər Məhkəməsi bir sıra seçki məntəqəsindəki nəticələrin ləğvi ilə bağlı şikayəti rədd edib.
Müşahidəçilərdən ibarət "Səsim" koalisiyası 1131 seçki məntəqəsində 900-dən çox qanun pozuntusunun baş verdiyini bildirib.
Qori şəhər Məhkəməsinə müraciət edən müşahidəçilər 14 seçki məntəqəsində səsvermə nəticələrinin ləğv edilməsini istəyiblər.
Hakim Nino Qoqaşvili beşsaatlıq dinləmələrdən sonra bu şikayəti rədd edib.
Tetritskaroda isə hakim Vladimir Kuçua "Gənc Hüquqşünaslar Assosiasiyası" vətəndaş qrupunun təqdim etdiyi sübutlar əsasında 30 seçki məntəqəsindəki nəticələrin ləğvinə qərar verib.
Mərkəzi Seçki Komissiyası (MSK) qərarı əsassız sayaraq etirazını bildirib. Bununla razılaşmayan müxalifət MSK-nın qərarını Apellyasiya Məhkəməsinə daşıyıb.
Müxalif qruplar Kuçuanı hakim partiyaya qarşı çıxan "nadir, cəsarətli hakim" kimi alqışlayaraq yeni seçkilərin keçirilməsini hədəfləyən nümayişləri sürdürəcəyini açıqlayıb.
"Yaxın gün və həftələrdə bizim vəzifəmiz Tbilisini insanlarla doldurmaqdır. Bütün əsas meydan, küçə və prospektlər insanlarla dolu olmalıdır", - "Dəyişiklik uğrunda Koalisiya"nın liderlərindən Nika Meliya belə deyib.
Apellyasiya Məhkəməsi hər iki şəhərdə - Qori və Tetritskaroda seçki günü qanun pozuntuları barədə məhkəmə qərarlarından şikayətlərə baxacaq.
Xatırlatma
Rəsmi bilgilərə görə, hakim "Gürcü arzusu" seçkidə səslərin 54 faizini toplayıb. Müxalifətin iki exit-poll-u hakim partiyanın 42 faiz səs yığdığını bildirib. Həmin sorğularda dörd müxalif partiyanın, açıq-aşkar, səs çoxluğu qazandığı deyilsə də, Gürcüstan MSK-sı bütün müxalifət qüvvələrinin toplam 37 faiz səs topladığını bəyan edib.
ATƏT, Avropa Şurası, Avropa Parlamenti və NATO-nun birgə bəyanatında deyilir ki, "bərabər olmayan rəqabət ortamı, basqı və gərginlik seçkilərə kölgə salıb". Seçki günü səslərin satın alınmasına, eyni şəxsin təkrar bülleten atmasına, fiziki zorakılıq və hədə-qorxu hallarına rast gəlindiyinə də diqqət çəkilib.
HRW Aİ liderlərini Azərbaycan hakimiyyətinə təzyiq göstərməyə çağırır
Avropa İttifaqının (Aİ) Bakıda COP29 iqlim konfransına qatılan liderləri siyasi ittihamlarla saxlananların məsələsini Azərbaycan hakimiyyəti qarşısında birbaşa qaldırmalı, onların azadlığa buraxılmasına çalışmalıdır. Belə bir çağırışla noyabrın 6-da "Human Rights Watch" daxil olmaqla 17 beynəlxalq insan haqları təşkilatı çıxış edib.
Bəyanatda deyilir ki, son iki ildə Azərbaycan hökuməti tənqidçilərinə hücumu gücləndirib. Aİ indi COP29-un yaratdığı nadir beynəlxalq fürsətdən yararlanaraq açıq danışmalı, ölkədəki vətəndaş cəmiyyəti, müstəqil media, insan haqları müdafiəçiləri üçün konkret yaxşılaşmaya nail olmalıdır.
İnsan haqları qurumları bildirirlər ki, Azərbaycan hökuməti tənqidçilərini siyasi motivli həbslər, saxta kriminal ittihamlarla hədəfə alır. Eləcə də qeyri-hökumət təşkilatlarına qarşı xeyli məhdudlaşdırıcı qanunları işə salır. Belə bir "alçaldıcı" sistem isə müstəqil fəalların, media və insan haqları müdafiəçilərinin işini görməsi üçün qanuni yollardan məhrum edir.
Anlaşma Memorandumunun yaratdığı öhdəliklər
Bəyanatda deyilir ki, Aİ Azərbaycanla enerji əməkdaşlığı daxil olmaqla iqtisadi və siyasi əlaqələrinə konkret insan haqları öhdəliklərini salmalıdır. Azərbaycanın Aİ-nin "Şərq tərəfdaşlığı" təşəbbüsünün üzvü olaraq belə öhdəlikləri var. Həmçinin ölkənin dövlət büdcəsinin mədən yanacağından asılılığı, 2022-ci ildə imzalanmış Aİ-Azərbaycan Anlaşma Memorandumunun siyasi təsir üçün ciddi alət olduğu vurğulanır.
"Aİ hakimiyyətə siyasi və diplomatik təsir göstərərək bu tərəfdaşlığın Aİ-nin xarici siyasətdə insan haqlarını müdafiə öhdəliklərinə uyğun gəlməsini təmin etməlidir", – bəyanatda vurğulanır.
İnsan haqları qurumları Azərbaycanda son iki ildə iqtisadçı, antikorrupsiya eksperti Qubad İbadoğlunun, insan haqları fəalı Anar Məmmədlinin, eləcə də azı 11 müstəqil jurnalist və media işçisinin müxtəlif saxta ittihamlarla saxlandığını vurğulayır. İki tədqiqatçı və sülh fəalı isə vətənə xəyanət ittihamı ilə həbs olunub.
Bəyanatda deyilir ki, Aİ liderləri Azərbaycan hakimiyyəti qarşısında siyasi motivlərlə saxlananların işlərini qaldırmalıdırlar. Q.İbadoğlu, A.Məmmədli, media eksperti Ələsgər Məmmədli, jurnalist Hafiz Babalı, iqtisadçı Fazil Qasımov, siyasi fəal Famil Xəlilov kimi müalicəyə ehtiyacı olanların işinə xüsusi önəm verilməlidir. Eləcə də təcridxanada işgəncə və pis rəftar iddialarını ictimailəşdirəndən sonra təhdid olunduğu bildirilən "AbzasMedia" direktoru Ülvi Həsənlinin işi qabardılmalıdır.
Aİ liderlərini Azərbaycanda olarkən çağırırlar ki, siyasi dəstək nümayişi kimi insan haqları müdafiəçiləri, jurnalistlər, müstəqil vətəndaş cəmiyyəti təmsilçiləri ilə görüşsünlər.
Bəyanatı "Amnesty International", Jurnalistləri Müdafiə Komitəsi, Avropa Jurnalistlər Federasiyası, "Freedom Now" və digər qurumlar imzalayıb.
Azərbaycan hakimiyyətinin bu bəyanata münasibəti bəlli deyil. Ancaq indiyədək hakimiyyət təmsilçiləri oxşar tənqidləri rədd edib, ölkəyə qarşı məqsədli qarayaxma kampaniyası aparıldığını deyiblər.
Son bir ildə saxlanan jurnalist və fəallar, əsasən, qaçaqmalçılıqda ittiham olunurlar. Özləri isə ittihamları qurama sayır, peşə fəaliyyətləri ilə əlaqələndirirlər.
Yerevan Aİ-dəki səfirinin azərbaycanlı həmkarı tərəfindən hədələndiyini bildirir
Ermənistanın Avropa İttifaqındakı (Aİ) səfiri Tiqran Balayanın bu yaxınlarda Brüsseldə keçirilən tədbirdə azərbaycanlı həmkarı Vaqif Sadıqov tərəfindən təhdid olunduğu bildirilir. Bunu Ermənistan xarici işlər nazirinin müavini Paruyr Ovannisyan noyabrın 4-də yerli mediaya deyib.
Onun sözlərinə görə, təhdid və təhqirlər bir diplomatik qəbulda baş verib, Ermənistan tərəfi Belçika hakimiyyəti və Aİ-ni insidentlə bağlı bilgiləndirib.
"İnsident üzrə araşdırma aparılır", – Ovannisyan jurnalistlərə deyib.
İnsident haqda ilk olaraq "Politico" nəşri yazıb, Balayan deyib ki, Sadıqov tədbirdə onu hədələyib. Brüsseldəki Ermənistan səfirliyi isə Belçika paytaxtındakı digər diplomatik missiyalara rəsmi şikayət göndərib.
Hadisənin Brüsseldəki "Tangla" otelində Türkiyə səfirliyinin ölkənin milli bayramı şərəfinə təşkil etdiyi qəbulda baş verdiyi iddia olunur. Nəşr Sadıqovun iddiaları təkzib etdiyini, onları "gülünc" adlandırdığını yazıb.
Azərbaycan Xarici İşlər Nazirliyi, hələlik, bu deyilənlərə münasibət açıqlamayıb.
Azərbaycan 2020-ci ildə 44 günlük müharibə və 2023-cü ildə birgünlük hərbi əməliyyatla ərazi bütövlüyünü bərpa edib. Ancaq Ermənistanla sülh sazişi imzalamayıb, sərhədlər demarkasiya olunmayıb.
Hazırda iki ölkə arasında sülh danışıqları davam edir.
Moskva yük aviareyslərində partlayışlar hazırlamaqda şübhəli bilinir
Şimali Amerikaya uçmalı olan yük və ya sərnişin təyyarələrində yanğın törətməyə yönəlmiş əməliyyatın arxasında Rusiya dayanır.
"The Wall Street Journal" bu haqda xəbəri Qərbin təhlükəsizlik rəsmilərinə istinadla yayıb.
Qəzet noyabrın 5-də xəbər yayıb ki, iyulda Britaniyanın Birminhem və Almaniyanın Leypsiq şəhərlərində qlobal yükdaşıma şirkəti DHL-in deposunda alışan qurğular Rusiyanın planının sınaq mərhələsi olub.
Keçən ay Polşa polisi məlumat yaymışdı ki, ABŞ və Kanadaya göndərilməsi planlanan və depolarda alışan bağlamalarla əlaqədar təhqiqatın nəticəsi olaraq dörd nəfər saxlanıb.
Məlumata görə, qrupun məqsədi kamuflyaj olunmuş partlayıcıları və təhlükəli materialları sabotaj məqsədilə ilk öncə Avropa İttifaqı ölkələrinə və Böyük Britaniyaya göndərmək olub. Amma sınaqlardan sonra belə bağlamaların ABŞ və Kanadaya göndərilməsi planlanıbmış.
Polşa polisi bunun arxasında xarici kəşfiyyatın durduğunu desə də, Rusiyanın adını çəkməyib.
Litva prezidentinin milli təhlükəsizlik müşaviri Kyastutis Budris isə noyabrın 5-də "Reuters"ə deyib ki, bu, NATO ölkələrinə qarşı əməliyyat olub və bunu Rusiyanın hərbi kəşfiyyatı planlayıb.
Rusiya məsələyə hələ ki münasibət bildirməyib.
Bu xəbər ABŞ-də prezident seçkiləri keçirilən gün yayılsa da, "The Wall Street Journal" xəbəri seçkilərlə əlaqələndirməyib.
Rusiya bundan öncə Ukraynaya hərbi yardım edən Avropa ölkələrində təxribatlar törədib.
İsrailin baş naziri müdafiə naziri Qalantı istefaya göndərib
İsrail hökumətinin başçısı Benyamin Netanyahu müdafiə naziri Yoav Qalantı vəzifəsindən azad edib, ona artıq etimad göstərmədiyini bildirib.
Qalantın əvəzinə hərbi idarəyə rəhbərlik xarici işlər naziri İsrael Katza həvalə edilib. Xarici siyasət idarəsinə isə bundan sonra hökumət üzvü Qideon Saar rəhbərlik edəcək.
"Müharibənin ilk aylarında etimadın olmasına və işin fayda verməsinə baxmayaraq, son aylarda müdafiə naziri ilə aramdakı bu etimad, təəssüf ki, sarsıldı", - Netanyahu istefaya münasibət bildirərkən vurğulayıb. O, həmçinin bildirib ki, Qalant bütün nazirlər kabinetinin qərarlarına zidd qərarlar verir, açıqlamalarla çıxış edirdi.
Y.Qalant da çərşənbə axşamı istefasını şərh edib. "İsrail dövlətinin təhlükəsizliyi həmişə mənim həyatımın işi olub və olacaq", - keçmiş müdafiə naziri vurğulayıb.
"Reuters"in məlumatına görə, hər ikisi sağçı "Likud" partiyasından olan Netanyahu və Qalant Fələstinin HƏMAS qruplaşmasına qarşı İsrail ordusunun Qəzza zolağındakı əməliyyatının gələcək hədəfləri barədə bir neçə aydır mübahisə edirlər. HƏMAS İsrailin özündə, ABŞ və Avropa İttifaqında terrorçu kimi tanınır. Əməliyyat 2023-cü il oktyabrın 7-də cihadçıların İsrailin cənubuna hücumundan dərhal sonra başlayıb. O zaman 1200-dən çox insanın öldürüldüyü, daha 250-dən çox insanın girov götürülərək Qəzzaya aparıldığı bildirilir.
Rusiyaya casusluqda suçlanan Nəzakət Məmmədovaya 13 il həbs cəzası kəsilib
Müxtəlif televiziya kanallarında, saytlarda siyasi şərhçi kimi çıxış edən Nəzakət Məmmədovaya dövlətə xəyanət ittihamıyla 13 il həbs cəzası kəsilib. Bugünlərdə Bakı Ağır Cinayətlər Məhkəməsində ona hökm oxunub.
46 yaşlı N.Məmmədova Rusiyanın xüsusi xidmət orqanlarıyla əməkdaşlıqda suçlanır. Cinayət işinin materiallarında iddia edilir ki, N.Məmmədova tapşırıqla “jurnalist”, “siyasi şərhçi” adı altında pərdələnib.
O, həm də Youtube-da “Alfa TV” adlı kanalın rəhbəri idi və burada aşkar şəkildə rusiyayönümlü materiallar yayımlanırdı. İttihama görə, sözügedən kanalın yaradılması, orada müsahibələrin təşkili və başqa materialların yayımı da ona verilən tapşırıqların tərkib hissəsi olub.
İddia olunur ki, N.Məmmədova mütəmadi Moskvaya gedib, orada məxfi görüşlər keçirib, gördüyü işlərin müqabilində ona pullar göndərilib. Lakin köçürülən pullar öz adına yox, başqalarının adına bankdan çıxarılıb.
N.Məmmədovanın başqa şəxsləri də Rusiyanın xüsusi xidmət orqanlarının əməkdaşları ilə görüşdürməyə çalışması da ittihamda yer alıb.
Amma N.Məmmədova dövlətə xəyanət ittihamını qəbul etmir. O, təqsirsiz olduğunu vurğulayıb. Deyib ki, Moskvaya konfranslara gedib, müəyyən kanallarda çıxış edib, aldığı pullar da buna görə ödənilən qonorarlar, ezamiyyət xərcləri olub: “Gizli pul almaq niyyətim olsaydı, elə nağd şəkildə alıb gətirərdim. Keçmiş həyat yoldaşımın mənim gəlirimi bilməsini istəmirdim. Ona görə gələn pulu başqalarının adına götürmüşəm”.
N.Məmmədovanı 2023-cü ilin oktyabrında Dövlət Təhlükəsizliyi Xidmətinin (DTX) əməkdaşları saxlayıb. Onun işi üzrə istintaq da bu qurumda aparılıb.
N.Məmmədova özü də vaxtilə DTX-da işləyib.
Rusiya və İranın seçki dezinformasiyası barədə ABŞ-nin xəbərdarlığı
ABŞ-nin kəşfiyyat və güvənlik rəsmiləri Rusiya və İranı seçkilər zamanı amerikalılar arasında nifaq salmaq üçün geniş kiberhücum və dezinformasiya kampaniyaları aparmaqda suçlayıblar. Milli Kəşfiyyat İdarəsinin, FTB-nin və ABŞ Kibergüvənlik və İnfrastrukturun Qorunması Agentliyinin birgə məlumatında belə deyilir.
Rusiyaya bağlı şəxslər seçkilərin legitimliyini zəiflətmək, seçki prosesi ilə bağlı seçicilərə qorxu aşılamaq, siyasi baxışlarına görə amerikalıların bir-birinə qarşı zor işlədə biləcəyi mövzularda saxta video və məqalələr hazırlayırlar.
"Zorakılığa həvəsləndirmə riski"
"Bu cəhdlər seçki komissiyası əməkdaşlarına qarşı zorakılığa həvəsləndirmə riski də daşıyır", - bəyanatda belə deyilir.
Yayılan saxta məqalələrin birində iddia edilir ki, hər iki namizədin mübarizə aparacağı mübahisəli ştatlarda ABŞ rəsmiləri seçki qutularına bülletenlər atacaq və dezinformasiya taktikasından yararlanacaqlar. Bir videomüsahibədə isə Arizonada seçkiləri saxtalaşdırmaqdan ötrü xaricdə saxta bülletenlərin hazırlandığı və seçki siyahılarının Harrisin xeyrinə dəyişdirildiyi iddia edilir.
Arizona ştatının rəhbəri videoda deyilənləri təkzib edərək onları saxta adlandırıb.
Dövlət agentliklərinin bəyanatında Rusiya "ən canlı təhlükə", İran "xarici təsirlərin önəmli təhdidi" adlandırılıb.
Bəyanatda Trampın seçki kampaniyasına kölgə salmaq üçün İranın zərərli kiberfəaliyyətlər gerçəkləşdirdiyinə də diqqət çəkilir.
Seçicilərə üz tutan rəsmilər bilgiləri güvənli və rəsmi qaynaqlardan əldə etməyə çağırıblar.
İran və Rusiya ABŞ-dəki seçkilər zamanı hər hansı dezinformasiya kampaniyasına qatıldıqlarını təkzib edib.
Azərbaycan prezidenti Qırğızıstana gedib
Azərbaycan prezidenti İlham Əliyev noyabrın 5-də Türk Dövlətləri Təşkilatı (TDT) dövlət başçılarının XI Zirvə görüşündə iştirak etmək üçün Qırğızıstan Respublikasına səfər edib.
Noyabrın 6-da Bişkekdə Türk Dövlətləri Təşkilatının (TDT) XI zirvə görüşü keçiriləcək.
TDT-dən bildirilib ki, sammit "Türk dünyasının gücləndirilməsi: İqtisadi inteqrasiya, dayanıqlı inkişaf, rəqəmsal gələcək və hər kəs üçün təhlükəsizlik" mövzusunda gerçəkləşdiriləcək. Görüşdə təşkilata üzv və müşahidəçi ölkələr arasında çoxtərəfli əməkdaşlıq məsələləri ilə yanaşı, regional və qlobal siyasi-iqtisadi inkişaf prosesləri ilə bağlı müzakirələrin də yer alacağı gözlənir. Toplantının yekunu olaraq dövlət başçılarının Bişkek Bəyannaməsi qəbul edilə bilər.
TDT 2009-cu ildə yaradılıb. Azərbaycan, Türkiyə, Qazaxıstan, Qırğızıstan və Özbəkistan qurumun üzvləridir.
Gürcüstan müxalifəti gündəlik etiraz aksiyalarına başladığını elan edib
Bu gündən Gürcüstan müxalifətinin aksiyaları gündəlik olacaq. Bunu "Dəyişikliklər uğrunda Koalisiya"nın liderlərindən biri Nika Meliya Gürcüstan parlamentinin binası qarşısında keçirilən mitinqdə deyib.
Onun sözlərinə görə, onlar "rejimi devirəcək bir güclü etiraz hərəkatı" yaratmaq niyyətindədirlər. Sabah, noyabrın 5-də aksiya iştirakçıları Tbilisi İdman Sarayında toplaşacaqlar.
"Hər gün küçədə olacağıq. Heç kim buraya [parlamentə] girə bilməyəcək qədər çox olmalıyıq, ancaq yalnız Rustavelidə dayanmaq kifayət deyil, biz bütün prospektlərdə dayanmalıyıq", - Meliya deyib.
Ehtimallara görə, müxalifət şəhərin əsas nəqliyyat arteriyalarını bağlamağı planlaşdırır. Bu gün müxalifətçilər xəbərdarlıq aksiyası keçiriblər. Onlar Tbilisinin mərkəzindəki Barataşvili körpüsündə nəqliyyatın hərəkətini dayandırıblar, daha sonra Marcanişvili meydanına doğru yürüş ediblər.
Etirazçılara Tbilisiyə gələn isveçli ekofəal Qreta Tunberq dəstək verib. O, Gürcüstan parlamentinin binası qarşısındakı aksiyaya qoşulub.
28 oktyabr
"Alternativimiz yoxdur"
Tbilisidə hakim "Gürcü arzusu" partiyasının parlament seçkilərindəki qələbəsini tanımayan müxalifət tərəfdarlarının mitinqi keçirilib. "Paper Kartuli" Telegram kanalının məlumatına görə, etirazçılar parlament binasının qarşısına toplaşaraq Rustaveli prospektini bağlayıblar.
Bundan əvvəl parlamentə keçən dörd müxalifət partiyasının hamısı "Gürcü arzusu"nun 54 faizə yaxın səs toplayaraq qalib gəldiyi seçkilərin nəticələrini tanımaqdan imtina edib. Bir çox müxalif siyasətçilərin fikrincə, nəticələr saxtalaşdırılıb. Gürcüstan prezidenti Salome Zurabişvili də səsvermənin nəticələrini tanımadığını bildirib.
Zurabişvili mitinqdə toplaşanlar qarşısında çıxış edib. O, Qərb liderləri ilə danışdığını və onların da seçkilərin qeyri-legitim olması ilə razılaşdıqlarını söyləyib. "Biz sizin konstitusion səsvermə hüququnuzu qorumaq üçün mübarizə aparacağıq. İndi bədbinlik vaxtı deyil, indi vacib olanı sakit və başımızı qaldıraraq səslərimizi qorumaqdır", - Gürcüstan prezidenti bildirib.
"And içə bilərəm ki, bu Avropa yolunun sonuna qədər və biz Avropanın qapılarına çatana qədər sizinlə olacağam. Bu, təkcə arzumuz deyil, reallıq və gələcəkdir, bizim alternativimiz yoxdur",- o, sözlərinə əlavə edib.
Müxalifət nümayəndələri təkrar seçkilərin keçirilməsini tələb ediblər. "Birlik-Milli Hərəkat" partiyasının liderlərindən biri Giorgi Vaşadze hesab edir ki, seçkilər beynəlxalq müşahidəçilərin nəzarəti altında keçirilməlidir.
Rusiyanın dövlət xəbər agentlikləri - TASS və "RİA Novosti" yazır ki, guya, "kütləvi etirazlar zamanı təxribatların təşkili üçün Ukraynada təlim keçmiş snayperlər" Tbilisiyə gəliblər. Lakin Gürcüstan və beynəlxalq medianın hadisə yerindən verdiyi məlumata görə, mitinqdə vəziyyət kifayət qədər sakit olub, qarşıdurma və həbslər qeydə alınmayıb.
Yerli vaxtla saat 21:30 radələrində mitinqin başa çatdığı elan edilib, sonda Gürcüstan və Avropa İttifaqının himnləri səsləndirilib.
"Mapchecking" xidmətinin hesablamalarına görə, aksiyada 15 minədək insan iştirak edib.
Xəzərdə Azərbaycan və İranın birgə təlimi keçirilib
Xəzər dənizinin İrana mənsub hissəsində bu ölkə ilə Azərbaycanın Hərbi Dəniz Qüvvələrinin bir qrup şəxsi heyəti və gəmisinin iştirakı ilə "AZIREX-2024" birgə taktiki təlimi keçirilib.
Azərbaycan Müdafiə Nazirliyinin noyabrın 4-də yaydığı məlumata görə, əvvəlcə "Dənizdə axtarış-xilasetmə" təliminin məqsədi və icra olunacaq tapşırıqlarla bağlı brifinq təqdim edilib, qarşılıqlı müzakirələr aparılıb: "Təlimdə gəmi qəzaları zamanı xilasetmə və tibbi yardım tədbirlərinin həyata keçirilməsi, axtarış-xilasetmə əməliyyatları, habelə gəmi təhlükəsizliyinin təmin olunması üzrə fəaliyyətlər icra edilib".
Ötən il dekabrında İran Hərbi Dəniz Qüvvələri (HDQ) Ordusunun komandanı kontr-admiral Şəhram İrani Azərbaycanda səfərdə olmuşdu. Onun Azərbaycandan olan həmkarı Sübhan Bəkirovla görüşündə Xəzər dənizində birgə təlimlərin keçirilməsinin vacibliyindən bəhs edildiyi açıqlanmışdı.
Hazırda İranla Azərbaycan arasında yaxınlıq müşahidə edilməkdədir. Halbuki əvvəlki illər bu iki ölkə arasında müəyyən gərginliklər yaşanmışdı.
Xatırlatma
Bundan əvvəlki illər hər iki ölkənin bir-birinin sərhədinə yaxın ərazidə hərbi təlimlər keçirməsi qarşılıqlı narazılıqlara səbəb olmuşdu. Hətta ötən il yanvarın 27-də Azərbaycanın Tehrandakı səfirliyinə "Kalaşnikov" avtomatı ilə silahlı hücum da oldu. Hədisə nəticəsində səfirliyin bir əməkdaşının həlak olduğu, ikisinin isə xəsarət aldığı açıqlandı. Bundan sonra səfirliyin işçiləri Azərbaycana təxliyə edildi.
Ardınca da Azərbaycanda bir çox həbslər oldu. Saxlananlar ən müxtəlif ittihamlarla (ən çox da narkotiklə) üzləşsələr də, hökumətə yaxın media orqanlarında onlar "İran casusu" kimi təqdim edilirdilər. Hərçənd onların yaxınları bununla dini kəsimdən olan bir çox şəxslərin şərləndiyini dedilər. Amma xüsusilə son aylar hər iki tərəfin rəsmiləri bir-biriləri ilə əməkdaşlığa dair fikirlər səsləndirirlər. Bu ilin iyulunda Azərbaycanın İrandakı səfirliyinin fəaliyyəti bərpa edilib.
Britaniyalı lobbiçilər Azərbaycandan 'ətraf mühit qoruyucusu' yaratdıqları üçün ittiham olunublar
Britaniyalı siyasətçilərə yaxın "Teneo" lobbi şirkəti COP29 iqlim sammiti öncəsi Azərbaycanın imicini yaxşılaşdırmaq üçün 4.7 milyon dollar pul alıb. "Democracy for Sale" (Satılan Demokratiya) təşkilatının araşdırmasında belə deyilir.
Araşdırmada Azərbaycanın "ətraf mühitlə bağlı məsuliyyətli imicini yaratmaq" üçün Böyük Britaniyanın keçmiş hökumət üzvlərinin də çalışdığı nəhəng bir şirkətin media təlimləri keçirdiyinə və "ölkənin narrativlərinin inkişafına dair" məsləhətlər verdiyinə diqqət çəkilir.
Bakıda lobbiçilərə Ceff Morrell başçılıq edir. O, Azərbaycanın ən böyük xarici yatırımçısı, BP şirkətinin keçmiş yönəldicisi olub.
Yarım iş günü çalışacaq britaniyalı məsləhətçilərə ayda 25-50 min dollaradək bonuslar ödəniləcək. Lobbiçilər arasında keçmiş baş nazir Boris Consonun baş biznes məsləhətçisi Aleks Hikman da var.
COP29-un Azərbaycanda keçirilməsini tənqid edənlər ölkədə gəlirlərin 60 faizinin neft-qaz satışından gəldiyini, insan haqları ilə bağlı durumun ürəkaçan olmadığını deyirlər.
Teneo və Azərbaycan hökuməti araşdırmaçılara məsələ ilə bağlı şərh verməyib.
Bu yaxınlarda sosial şəbəkələrdə milyonlarla izləyicisi olan "Nas Daily"nin videobloqerlər komandası da Azərbaycanda keçiriləcək COP29 sammiti barədə videoçarx hazırlayıb.
Noyabrın 11-dən 22-dək Bakıda keçiriləcək həmin sammitə qatılacaq dünya liderləri iqlim dəyişikliyinin mənfi sonuclarını birgə aradan qaldırmaq planlarını müzakirə edəcəklər.
Rusiya Ukraynada mühüm kəndi ələ keçirdiyini bildirir
Ukrayna ordusu sənaye şəhəri - Kuraxovo yaxınlığında şiddətli döyüşlər getdiyini xəbər verir. Həmçinin, Rusiya qoşunlarının Donbasın strateji baxımdan mühüm Kuraxovka kəndi ətrafında 100-dən çox hücum gerçəkləşdirdiyini bildirsə də, onun tutulması ilə bağlı iddiaları şərh etməyib.
Noyabrın 3-də tərəflər qarşılıqlı dron hücumları gerçəkləşdirib.
Rusiya Müdafiə Nazirliyi düşmənin 20-dək PUA-sını zərərsizləşdirdiyini bildirib.
Gecəboyu sürən döyüşlərdən sonra gücü tükənən Ukrayna əsgərləri geri çəkilib və rusiyalılar irəliləyiblər.
Noyabrın 3-də rusiyalılar önəmli nəqliyyat məntəqəsi sayılan Pokrovskın 6 kilometrliyindəki bir kəndi tutduqlarını bildiriblər. Bu bilgini də təsdiqləməyən Ukrayna Baş Qərargahı Pokrovsk civarına 19 hücumun gerçəkləşdirildiyini, düşmənin başlıca səylərinin Promin və Vişnyovoye kəndləri səmtinə yönəldiyini deyib. Bununla belə, Ukrayna ordusu ən gərgin durumun Kuraxovo yaxınlığında olduğunu etiraf edib.
Bir gün öncə rusiyalılar şəhərə yaxın böyük su anbarının olduğu Kuraxovka kəndini ələ keçidiklərini bildiriblər.
Rusiyanın əsas məqsədi Pokrovsk şəhərini işğal etməkdir. Önəmli nəqliyyat və tədarük məntəqəsi olmaqla yanaşı, burada Ukraynanın sənayesi üçün böyük önəm daşıyan koks kömür mədəni yerləşir.
Ukrayna ordusunda əsgər, təchizat, eləcə də silah çatışmazlığı gözə çarpır. Bu durum ukraynalıların Rusiya hücumlarına dirənişini əngəlləyir.
'Amnesty International' etirazçı iranlı tələbəni azad etməyə çağırıb
"Amnesty International" etirazını oxuduğu universitetin həyətində soyunmaqla bildirən iranlı tələbəni dərhal azad etməyə çağırıb. Həmin tələbə "Bəsic" üzvləri ilə güvənlik qüvvələrinin basqısına məruz qaldığından elə davranmışdı. "Amnesty International"ın bəyanatında belə deyilir.
İran hakimiyyəti alt paltarınadək soyunan xanım tələbəni universitetin xaricində həbs etmişdi. Olayla bağlı videonu öncə "Əmir Kabir" tələbə kanalı, ardınca kürdlərin "Hengaw" insan haqları qrupu, "Amnesty International" və digər qurumlar yaymışdı.
"Azad edilənədək hakimiyyət onu işgəncə və digər pis davranışdan qorumalı, ailə üzvləri və vəkillə görüşə şərait yaratmalıdır", - bəyanatda əksini tapan sözlərdir.
Təşkilat həbs zamanı tələbənin döyülmə və cinsi zorakılığa məruz qalması ilə bağlı ittihamları müstəqil və qərəzsiz araşdırmağa, hadisəni törədənləri məsuliyyətə cəlb etməyə çağırıb.
Olayın səbəbləri ilə bağlı iki versiya var
"The Associated Press"in bilgisinə görə, tələbə yarımhərbi "Bəsic" qrupunun üzvləri ilə güvənlik qüvvələrinin basqısına məruz qalıb. Onlar xanım tələbənin baş örtüyünü və paltarını cırıblar. Buna etiraz olaraq alt paltarınadək soyunan tələbə universitet ərazisini nümayişkaranə şəkildə dolaşıb və ali məktəbin həyətindəcə oturub.
İranın "Fars" xəbər agentliyi isə iddia edir ki, tələbə uyğun geyimlə dərsə gəlmədiyi üçün universitet mühafizəçilərinin xəbərdarlığına etiraz olaraq soyunub.
Xanım tələbə ilə sakitcə danışıldığı və onunla aqressiv davranılmadığı deyilsə də, "Əmir Kabir" kanalının yaydığı bilgiyə görə, həbs zamanı onun başını maşının qapısına çırpdıqlarından təkərlərin üzərində qan izləri olub.
'Bank Avrasiya' 'Paşa Holdinq'in nəzarətinə keçir?
Oktyabrın 30-da "Bank Avrasiya" ASC-nin səhmdarları siyahısında dəyişiklik olub.
Səhmdarların ümumi yığıncağının qərarına əsasən, bankın nizamnamə kapitalının 37.5 faiz hissəsinə malik "YevroStandart" MMC-nin payı "Top Properties" MMC-yə satılıb.
Eyni zamanda, bankın digər səhmdarı - "PMD Group" MMC-nin nizamnamə kapitalındakı 37.5 faiz iştirak payının 12 faizi "Top Properties" MMC-yə, 24.5 faizi artıq 25 hissəyə sahib olan "Azbizneskom" MMC-yə və 1 faizi isə Rüstəm Eynullayevə satılıb.
Bununla da bankın nizamnamə kapitalının 49.5 faizinə "Top Properties" MMC, 49.5 faizinə "Azbizneskom" MMC və 1 faizlik hissəsinə isə R.Eynullayev sahiblik edir.
"Bank Avrasiya" ASC 2007-ci ildən fəaliyyət göstərir.
"Top Properties" MMC-nin "Paşa Holdinq" qrupunun nəzarətinə keçməsi ilə bağlı bir neçə il əvvəl yerli mediada məlumatlar yer alıb. İndiyə kimi belə məlumatlar təkzib edilməyib.
Yerli və xarici mediada "Paşa Holdinq" qrupunun isə ölkə başçısının ailəsinə yaxın şəxslərlə məxsus olduğu ilə bağlı məlumatlar yayılıb.
Hazırda Azərbaycanda 20 civarında bank fəaliyyət göstərir.
Şimali Koreya Rusiyanı Ukraynada 'qələbə qazananadək' dəstəkləyəcək
Şimali Koreya xarici işlər naziri Soy Son Hi bildirib ki, ölkəsi Ukraynadakı "qələbəsinədək" Rusiyanı dəstəkləyəcək.
Rusiyalı həmkarı Sergey Lavrovla noyabrın 1-də keçirdiyi görüşdə koreyalı nazir iki ordu və xüsusi xidmət orqanları arasında çox sıx əlaqələrin olduğunu, müdafiə sahəsində qarşılıqlı əməkdaşlığın genişləndirildiyini söyləyib.
Kreml öz ərazisində Şimali Koreya qoşunlarının yerləşdirilməsini nə danıb, nə də təsdiqləyib.
NATO baş katibi Mark Rutte deyib ki, şimali koreyalıların birbaşa döyüşlərə qatılması qlobal güvənliyə təhdiddir və beynəlxalq hüququn pozulduğunu, Rusiya prezidenti Vladimir Putinin "artan çarəsizliyini" göstərir.
ABŞ dövlət katibi Antoni Blinken döyüşlərə qatılacaqları halda, Kursk vilayətində yerləşən 8 minədək şimali koreyalı hərbçinin legitim hərbi hədəf sayılacağını söyləyib.
ABŞ, Cənubi Koreya və Yaponiya Şimali Koreyanın qitələrarası ballistik raket sınağını da pisləyib.
Soy isə Moskvada deyib ki, Koreya yarımadasındakı durum hər an "partlaya bilər" və bu üzdən Şimali Koreya özünün nüvə ehtiyatını gücləndirməli və gərəkəndə cavab zərbəsi endirməyə hazır olmalıdır.
Şahin Mustafayev və Mher Qriqoryan sərhəddə görüşüblər
Bu gün, noyabrın 1-də iki ölkənin sərhədində Azərbaycan baş nazirinin müavini Şahin Mustafayev ermənistanlı həmkarı Mher Qriqoryanla görüşərək nəqliyyat kommunikasiyaları məsələlərini müzakirə ediblər.
AZƏRTAC bildirir ki, həmin görüşdən öncə isə onların sədrliyi altında iki ölkənin sərhəd məsələlərinə dair komissiyalarının 10-cu görüşü keçirilib.
Məlumata görə, görüşdə komissiyaların birgə fəaliyyəti haqqında bu ilin avqustun 30-da imzalanmış Əsasnamənin qüvvəyə minməsi üçün zəruri dövlətdaxili prosedurların icrası barədə bildirişləri mübadilə ediblər. Əsasnamə 2024-cü il noyabrın 1-də qüvvəyə minir.
"Tərəflər növbəti mərhələdə delimitasiya işlərinin həyata keçirilməsi üçün sərhəd xəttinin sahələrinin/hissələrinin ardıcıllığı məsələsi ətrafında fikir mübadiləsi apardılar. Tərəflər delimitasiya işlərinin görülməsinin qaydası üzrə müvafiq təlimatların layihələrini müzakirə etdilər", - məlumatda əlavə edilib.
25 oktyabr
Yerevan və Bakıda sərhəd haqqında fərman imzalanıb
Oktyabrın 25-də Ermənistanla Azərbaycan prezidentləri ayrılıqda bu iki ölkə sərhədlərinin delimitasiya və demarkasiyası qaydalarını təsdiq edən əsasnaməni imzalayıblar.
Ermənistan Milli Assambleyası onu iki gün əvvəl ratifikasiya edib.
İndiyədək Azərbaycanda əsasnamənin ratifikasiyası istiqamətində hansı addımlar atıldığı barədə ölkə ictimaiyyətinə məlumat verilməyib. Əvvəllər bildirilirdi ki, bu prosedurlar Bakı və Yerevan tərəfindən eyni vaxtda həyata keçirilməlidir.
Sənəddə Ermənistan-Azərbaycan sərhədinin demarkasiyasının necə həyata keçirilməsi nəzərdə tutulur. Orada göstərilən yeganə əsas prinsip 1991-ci il Alma-Ata Bəyannaməsidir, lakin aydın xəritələr yoxdur.
Ermənistan müxalifəti qətnamənin ratifikasiyasının Ermənistanın dövlət maraqlarına zidd olduğunu bildirərək müzakirədə və səsvermədə iştirak etməyəcəyini açıqlamışdı.
Sentyabrın 26-da Konstitusiya Məhkəməsi sərhədin demarkasiyası prosedurunu Ermənistan Konstitusiyasına uyğun olaraq tanıyıb.
Delimitasiya prosesi qonşu dövlətlərlə sərhəd xətlərinin müəyyən edilməsinin ilk mərhələsidir. Demarkasiya zamanı isə, bir qayda olaraq, genişmiqyaslı xəritələr üzərində relyef, hidroqrafiya, yaşayış məntəqələri ətraflı göstərilir.
Xatırlatma
Ermənistanla Azərbaycan arasında konflikt 30 ildən çoxdur davam edir. 2020-ci il 44 günlük müharibə və 2023-cü il sentyabrında Qarabağdakı əməliyyatlardan sonra Azərbaycan ərazi bütövlüyünü təmin edib. Tərəflər arasında 44 günlük müharibədən sonra aktiv sülh danışıqları aparılsa da, hələlik, yekun nəticə əldə etmək mümkün olmayıb. Bununla belə, həm Bakı, həm Yerevan sülh sazişini imzalamaq niyyətində səmimi olduqlarını və artıq müqavilənin böyük hissəsinin razılaşdırıldığını deyirlər.
NİDA-çı gəncə 30 sutka verilib
NİDA Vətəndaş Hərəkatının üzvü Mete Türksoy inzibati qaydada həbs olunub.
Yasamal rayon Məhkəməsinin qərarı ilə o, oktyabrın 31-də İnzibati Xətalar Məcəlləsinin 510 (xırda xuliqanlıq) və 535-ci (polisin qanuni tələbinə tabe olmamaq) maddələri ilə 30 sutka həbs olunub.
Yaxınlarının bildirməsinə görə, M.Türksoyu oktyabrın 30-da axşam saatlarında Bakıda metronun "Nizami" stansiyasında polis saxlayıb. Vurğulandığına görə, onun saxlamasının səbəbi polis nəfəri ilə arasında anlaşılmazlığın yaranması olub.
"Mete Türksoyun qeyri-siyasi səbəblərlə başlayan saxlanılması prosesinin artıq siyasi rəng aldığı qənaəti yaradır. Onun ictimai və siyasi fəaliyyəti, son dövrlərdə yazdığı statuslar və yaxın gələcəkdəki planlarının ona qarşı bu cür rəftarın əsas səbəbi olduğunu düşünürük", - NİDA Vətəndaş Hərəkatından bildirilib.
Məsələ ilə bağlı Daxili İşlər Nazirliyi və Yasamal rayon Məhkəməsindən əlavə münasibət almaq mümkün olmayıb. Amma rəsmi qurumlar, bir qayda olaraq, ölkədə siyasi həbslərin olması ilə bağlı deyilənləri qəbul etmirlər.
M.Türksoy 2019-cu ildə də inzibati qaydada həbs olunmuşdu. O, həmin vaxt həbsdə olan bloqer Mehman Hüseynova azadlıq tələbi ilə Bakıda şəhər rəhbərliyi ilə razılaşdırılmadan keçirilən aksiyada saxlanılaraq 25 sutka inzibati qaydada həbs olunmuşdu.
Rusiyalı təbliğatçı seçki günlərində Gürcüstanda olub
Mediada Kremlyönlü fəaliyyəti ilə tanınan rusiyalı təbliğatçı Aleksandr Malkeviç parlament seçkiləri günlərində Tbilisidə olub. Bu bilgi Sərhədsiz Reportyorlar Təşkilatının (RSF) bəyanatında əksini tapıb.
Rusiyalının Gürcüstana gəlişini pisləyən RSF onun orada olmasını dezinformasiya qaynağı kimi dəyərləndirib.
Malkeviç sosial media hesablarında Gürcüstanın ayrı-ayrı yerlərində siyasi tədbirlərə və tarixi məkanlara aid paylaşımlar edib. Mübahisəli fəaliyyətinə görə digər ölkələrə girişi yasaqlanan Malkeviçin Gürcüstana səfəri narahatlıq doğurub.
AzadlıqRadiosunun gürcü xidməti məsələ ilə bağlı şərh almaqdan ötrü Gürcüstan Daxili İşlər Nazirliyinə üz tutub.
RSF-nin son araşdırmalarından birinə görə, Ukraynanın işğal olunmuş Donbas bölgəsi də daxil, bir sıra yerlərdə media layihələrini gerçəkləşdirmək üçün Malkeviçin geniş resursları var.
Xatırlatma
Rəsmi bilgilərə görə, hakim "Gürcü arzusu" seçkidə səslərin 54 faizini toplayıb. Müxalifətin iki exit-poll-u hakim partiyanın 42 faiz səs topladığını bildirib. Üstəlik, həmin sorğularda dörd müxalif partiyanın, açıq-aşkar, səslərin çoxluğunu qazandığı deyilsə də, Gürcüstan MSK-sı bütün müxalifət qüvvələrinin toplam 37 faiz səs topladığını bəyan edib.
ATƏT, Avropa Şurası, Avropa Parlamenti və NATO-nun birgə bəyanatında deyilir ki, "bərabər olmayan rəqabət ortamı, basqı və gərginlik seçkilərə kölgə salıb". Seçki günü səslərin satın alınmasına, eyni şəxsin təkrar bülleten atmasına, fiziki zorakılıq və hədə-qorxu hallarına rast gəlindiyinə də diqqət çəkilib.
